މި ސަރުކާރު ވެރިކަމާ ހަވާލުވި ފަހުން، ފާއިތުވި 8 މަސްތެރޭ 2069 ބިދޭސީން ފުރުވާލާފައިވާކަމުގައި އިމިގްރޭޝަންއިން ބުނެފިއެވެ. މީގެ ތެރޭގައި ކަޅު ބާޒާރުގައި ޑޮލަރު ވިއްކާ ފަރާތްތަކާއި ޖިނާއީ ކުއްތަކަށް އަރައިގަންނަމުންދިޔަ ފަރާތްތައްވެސް ހިމެނޭކަން އިމިގްރޭޝަންއިން ހާމަ ކޮށްފައި ވެއެވެ.
އެ އޮތޯރިޓީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ކޮންޓްރޯލަރ އޮފް އިމިގްރޭޝަން ޝަމްއާން ވިދާޅުވީ ފާއިތުވި ނޮވެމްބަރުމަހާ ހަމައަށް ކުރީ ސަރުކާރަށް ފޮނުވާލެވިފައިވަނީ 2021 ބިދޭސީން ކަމުގައެވެ.
މިއަދު ނޫސްވެރިންގެ ބައްދަލުވުމުގައި އިމިގްރޭޝަންއިން ބުނެފައިވަނީ މިއަހަރު މިހާތަނަށް ރެއިޑް އޮޕަރޭޝަންތަކުގައި 153 ތަނެއް ބަލާ ފާސްކޮށްފައިވާ ކަމަށާއި، އޭގެ އިތުރުން ސައްހަ ނޫން ލިޔުންތައް ބޭނުން ކޮށްގެން އެއަރޕޯޓުން ރާއްޖެ އެތެރެވާން މަސައްކަތްކުރި 1664 ފަރާތެއް ފާހަގަ ކުރެވުނު ކަމަށެވެ. އޭގެ ތެރޭގައި 85 ގައުމެއްގެ 1289 ފަރާތެއް ހުއްޓުވާފައިވާކަން ފާހަގަ ކުރަމުން އިމިގްރޭޝަންއިން ބުނެފައިވަނީ މީގެ ތެރޭގައި ޝަޚުސު އޮޅުވާލައިގެން ރާއްޖެ އެތެރެވާން އުޅުނު އެކަކު ހިމެނޭކަމުގައެވެ.
އެގޮތުން އޮޅުވާލައިގެން ޓޫރިސްޓު ވިސާގައި ރާއްޖެ އެތެރެވާން އުޅުނު މި 1298 ފަރާތުގެ ތެރޭގައި ބަންގްލަދޭޝްގެ 356 މީހަކާއި، ސްރީ ލަންކާގެ 195 މީހަކާއި، އިންޑިއާގެ 162 މީހަކު ހިމެނޭކަމަށް އިމިގްރޭޝަންއިން ބުނެފައި ވެއެވެ.
އިިގްރޭޝަންއިން މިއަދުވަނީ، ފާއިތުވި 8 މަސްތެރޭގައި ހިގައިދިޔަ ޚާއްސަ 3 ކޭސްއެއް ފާހަގަ ކޮށްފައެވެ. އެއީ މިއަހަރުގެ ޖުލައިމަހުގެ 3 ވަނަ ދުވަހު ވިސްޓަ އެއަރލައިން ރާއްޖެއައި ލަންކާގެ 3 މީހަކު ރާއްޖެ ޓްރާންސިޓް ބަނދަރަކަށް ހަދާ ޔޫރަޕަށް އެތެރެވާން މަސައްކަތްކުރި ކުރުމާއި، 23 އަންހެނަކު ރާއްޖެ އެތެރެކޮށް ހަށިވިއްކަމުންދިޔަ ބިދޭސީއަކު ޑީޕޯޓު ކުރިކުރުމުގެ އިތުރުން ކަޅު ބާޒަރުގައި ގަވާއިދާ ޚިލާފަށް ފައިސާ މާރުކުރަމުންދިޔަ 8 ބިދޭސީއަކު ހައްޔަރުކޮށް 6 ބިދޭސީއަކު ޑިޕޯޓު ކޮށްލި ކޮށްލުމެވެ.
