އިންޑިއާގެ މުމްބާއީގެ މަހާރާސްތުރާގެ ބަޖެޓް އެއަރލައިންއެއްކަމަށްވާ ގޯއެއަރއިން ރާއްޖޭގެ މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އަށް 3 މިލިއަން ޑޮލަރު ދެއްކުމަށް ސިވިލް ކޯޓުން ހުކުމް ކޮށްފިއެވެ.
މީރާއިން ގޯއެއަރއާއި ދެކޮޅަށް ދައުވާ ކޮށްފައިވަނީ، އެއާޕޯޓު ސާވިސް ޗާޖާއި ޑިޕާޗާ ޓެކްސްއާއި އެއާޕޯޓު ޑިވެލޮޕްމަންޓް ފީގެ ގޮތުގައި 3،580،588 (ތިން މިލިއަން ފަސް ލައްކަ އަށްޑިހަ ހާސް ފައްސަތޭކަ އަށްޑިހަ އަށް) އެމެރިކާ ޑޮލަރު ހޯދުމަށެވެ.
މި މައްސަލާގައި ސިވިލް ކޯޓުން ކުރި ހުކުމުގައި ވަނީ، 2022 ވަނަ އަހަރުން ފެށިގެން ފަސިންޖަރުންގެ އަތުން ނަގާ ޑިޕާޗާ ޓެކްސްއާއި، އޮކްޓޯބަރު 28، 2018 އިން ފެށިގެން ފަސިންޖަރުންގެ އަތުން ނަގާ އެއާޕޯޓު ޑިވަލޮޕްމަންޓް ފީ ގޯއެއަރއިން ދައުލަތަށް ދައްކަންޖެހޭ ކަމަށް ސާބިތުވާ ކަމަށެވެ.
އަދި މި މަހުގެ ތިންވަނަ ދުވަހުން ފެށިގެން އެއް މަސް ދުވަސްތެރޭ އެ ފައިސާ މީރާއަށް ދައްކާ ޚަލާސްކުރުމަށް ސިވިލް ކޯޓުގެ ހުކުމުގައި ބުނެފައި ވެއެވެ.
މި މައްސަލަ ސިވިލް ކޯޓުން ނިންމާފައިވަނީ ގޯއެއަރގެ ޢައިރު ހާޒިރުގައެވެ. އޭގެ ސަބަބެއްކަމަށް ސިވިލް ކޯޓުން ބުނެފައިވަނީ މައްސަލައިގެ ދައުވާ ފޯމާއި ލިޔުންތައް، ގޯއެއާއަށް ރައްދުކުރުމުން ވެސް އެ ކުންފުނިން ކޯޓަށް ހާޒިރުވެފައި ނުވުމާއި، އެ ކުންފުންޏަށް ދައުވާގެ ދިފާއެއް ހުށަހަޅަން ދިން މުއްދަތުގައި އެއްވެސް ދިފާއެއްވެސް ހުށަހެޅިފައިނުވުމެވެ.
އިންޑިއާގެ ބަޖެޓް އެއަރލައިނެއްކަމަށްވާ ގޯއެއަރ އެންމެ ފުރަތަމަ އުފެއްދި "ގޯ ފަސްޓު" އަކީ އިންޑިއާގެ މުމްބާއީގެ މަހާރާސްތުރާގައި އޮޕަރޭޓްކުރާ އެއަރލައިންއެކެވެ. އެއަރލައިންއަކީ އިންޑިއާގެ ވަޑިއާ ގުރޫޕުން ހިންގާ ކުންފުންޏެކެވެ. އެއަރލައިން އޮޕަރޭޓް ކުރަންފެށީ 4 ނޮވެމްބަރ 2005 ގައެވެ. މިހާރު އެކުންފުނީގައި އޮންނަނީ އެއަރބަސް އޭ-320ގެ އިނޮމީ ކުލާހުގެ ފްލީޓެކެވެ.
