މަސްވެރިންނަށް ލިބޭ އާމްދަނީ އިތުރުކުރެއްވުމަކީ ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު މިވަގުތު އެންމެ ބޮޑު އަހައްމިއްޔަތުކަމެއް ދެއްވައިގެން ވަރަށް އަވަސް ހައްލެއް ހޯއްދަވަން މަސައްކަތްޕުޅުކުރައްވަމުން ގެންދަވާ ކަމެއްކަމަށް ފިޝަރިޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.
މަސްވެރިޔަކު ލިޔުނު ސިޓީގައި ވަނީ ކުރީ ރިޔާސީ އިންތިހާބުގައި މަސްވެރިންނާ ގުޅޭގޮތުން ދައްކާފައިވާ ވާހަކަފުޅުތަކާއި، ވެވަޑައިގެންފައިވާ ވަޢުދުތައް ހަނދާންކޮށްދީފައެވެ.
އަޅުގަނޑުމެން މަސްވެރިން މި ތިބެނީ އަނގަޔާ އަތާ ދިމާނުވެއެވެ. ކުދިންގެ ޓިއުޝަންފީ އަދި އިންޓަރަވަލް، ޤުރުއާން ކުލާސްތަކުގެ ފީ، ބިލްތައް ނުދެއްކިފައެވެ. ނަމަވެސް މަނިކުފާނަށް ދަޢުލަތުގެ ހަޒާނާއިން ދަނީ ހުރިހާ އިނާޔަތެއްވެސް ލިބެމުންނެވެ.
– ސިޓީގައިވެއެވެ.
މިނިސްޓަރ މިހެން ވިދާޅުވީ މަސްވެރިންގެ ހުރި ކަންބޮޑުވުންތައް ބަޔާންކޮށް މަސްވެރިއަކު މިނިސްޓަރަށް އެޑްރެސްކުރައްވާ ސޯޝަލް މީޑިއާގައި ޢާންމުކުރި ސިޓީއަކަށް ދެއްވި ޖަވާބުގައެވެ. މިނިސްޓަރ ވިދާޅުވީ، މީސްމީޑިޔާ މެދުވެރިކޮށް ފާޅުކުރެއްވި ކަންބޮޑުވުމަކީ ރައީސުލްޖުމުހޫރިއްޔާވެސް މިވަގުތު އެންމެ ބޮޑު އަހައްމިއްޔަތުކަމެއް ދެއްވައިގެން ވަރަށް އަވަސް ހައްލެއް ހޯއްދަވަން މަސައްކަތްޕުޅުކުރައްވަމުން ގެންދަވާ ކަންބޮޑުވުމެއްކަމަށެވެ.
ވަރަށް އުފާކޮށްފިން މީސްމީޑިޔާ މެދުވެރިކުރައްވާ އެތައް މަސްވެރިއެއްގެ ޙައްޤުގައި އަޑުއުފުއްލެވީތީ. އަޅުގަނޑުމެންނަކީ އިރާދަކުރެްވިއްޔާ ދައްކާ ވާހަކަ ހަނދާންނައްތާލާނެ ބައެއްނޫންކަން ޔަޤީންކަން އަރުވަން. މަސްވެރި ސިނާޢަތުގައި ހުރި ގޮންޖެހުންތަކަށް ދާއިމީ ހައްލެއް ރައީސް ޑރ.މުއިއްޒުގެ ސަރުކާރުގައި އަޅުގަނޑުމެން ލަސްތަކެއްނުވެ ހޯދާނަން إن شاءالله. ޖިނައްޕެއަށް ގުޅާލުމުން ހިއްސާކުރެއްވި ވާހަކަފުޅަކީ މުހިއްމު ވާހަކަފުޅެއް އަދި އެކަމަށް ނިމުމެއް ގެނެވޭނެ.
– މިނިސްޓަރ ވިދާޅުވިއެވެ.
ގިނަކަންކަމަކީ ވާހަކަ ދައްކައިގެން ހައްލުހޯދޭނެ ކަންކަންކަމަށްވެސް މިނިސްޓަރ ވިދާޅުވިއެވެ.
އަޅުގަނޑުމެންގެ އަމާޒަކީ މަސްވެރިންގެ އަޑު ގާތުން އަހައިގެން ޖުމްލަ ހައްލަށް މަސައްކަތްކުރުން.
– މިނިސްޓަރ ވިދާޅުވިއެވެ.
މަސްވެރިންގެ ހުރި ކަންބޮޑުވުންތައް ހައްލުކޮށްދޭނެކަމުގެ ޔަޤީންކަން ސަރުކާރުން ދިފައިވެއެވެ. އެގޮތުން ނިމިދިޔަ ސަރުކާރުގައި މަހުގެ އަގުބޮޑުކޮށް މަސްވެރިންނަށް ނުދީ ހުރި ގިނަ ޢަދަދެއްގެ ފައިސާ މިސަރުކާރުން ވަނީ ދީފައެވެ.
