އަރަބިއްޔާ ސްކޫލުގައި ކިޔަވައިދޭ ޓިޗަރެއް ކަމަށްވާ ޒަމްޒަމް ފާރިޝް އެ ސްކޫލުގެ ދަރިވަރުންނަށް ޖިންސީ ފުރައްސާރަ ކުރިކަމަށް ބުނާ މައްސަލައެއް އެޑިއުކޭޝަން މިނިސްޓްރީ އާއި ޖެންޑާ މިނިސްޓްރީން ޕޮލިހަށް ހުށަހަޅައިފިއެވެ.

ބައެއް މީޑިއާތަކުން ރިޕޯޓު ކޮށްފައިވާ ގޮތުގައި ޒަމްޒަމް ފާރިޝްއާއި ގުޅުންހުރި ޖިންސީ ފުރައްސާރައިގެ މައްސަލައާއި ގުޅުންހުރި ރިޕޯޓު ފުލުހުން އެޑިއުކޭޝަން މިނިސްޓްރީއަށް ފޮނުވާފައިވަނީ ކުރީ ސަރުކަރު ބަދަލުވުމުގެ 3 ދުވަސް ކުރިންނެވެ. އެއީ ނޮވެމްބަރުމަހުގެ 14 ވަނަ ދުވަހުއެވެ. އެއަށްފަހު ސަރުކާރު ބަދަލުވުމަށްފަހު އެޑިއުކޭޝަން މިނިސްޓަރުކަމާ ހަވާލުވި ޑރ. އިސްމާއިލް ޝަފީއުގެ ސަމާލުކަމަށް އެމައްސަލަ ގެނެސްފައިވަނީ ނޮވެމްބަރުމަހުގެ 19 ވަނަ ދުވަހުކަމަށްވެސް މީޑިއާތަކުގައި ރިޕޯޓު ކޮށްފައިވެއެވެ.

މައުލޫމާތު ލިބިފައިވާ ގޮތުގައި މިހާރުވެސް އެމައްސަލަ ބަލަމުން އަންނައިރު އޭނާ ވަނީ އެ ސްކޫލުގެ ވަޒީފާއިން ވަކިވާން ނިންމާފައެވެ. އެހެންނަމަވެސް ޒަމްޒަމް ފާރިޝްގެ ފަރާތުން އެކަން ޔަގީން ކުރެވިފައެއް ނުވެއެވެ.

މިމައްސަލައާއި ގުޅޭގޮތުން އެޑިއުކޭޝަން މިނިސްޓްރީގެ ރަސްމީ ބަހެއް އަދި ލިބިފައެއް ނުވެއެވެ.

މައުލޫމާތު ލިބިފައިވާ ގޮތުގައި ޖިންސީ ފުރައްސާރައަށް ތުހުމަތު ކުރެވޭ ވާހަކަ އޭނާ ސްކޫލުގެ ބައެއް ދަރިވަރުންނާ ދައްކާ، އަދި ބައެއް ކުދިންނާއި އޮންނަން ނުޖެހޭ ގުޅުންތައް އުފެއްދުމަށް އޭނާ މަސައްކަތް ކޮށްފައިވާކަމުގެ ޝަކުވާ އެ ސްކޫލުގެ ބައެއް ކުދިން ޓީޗަރުންނާ ހިއްސާ ކޮށްފައި ވެއެވެ.

މިގޮތުން އެ މައްސަލަ އެންމެ ފުރަތަ އެޑިއުކޭޝަން މިނިސްޓްރީއަށް ހުށަހެޅުމުން އެ މިނިސްޓްރީން ޖެންޑަރ މިނިސްޓްރީއާއި ގުޅިގެން މައްސަލަ ފުލުހުންގެ އިދާރާއަށް ހުށަހަޅާ އެ މައްސަލަ ފުލުހުންގެ އިދާރާއިން ތަހުގީގު ކުރަން ފެށިކަމަށް ބައެއް ފަރާތްތަކުން މައުލޫމާތު ދީފައި ވެއެވެ.

ޒަމްޒަމް ފާރިޝްވަނީ ކުރިންވެސް ވަޒީފާއިން ސަސްޕެންޑް ކުރެވިފައެވެ. އޭނާ އޭރު ސަސްޕެންޑް ކުރެވުނީ ކުރީގެ ވެރިކަމުގައި ރައީސް ސާލިހު ނެރުއްވި ގަރާރަކަށް ފާޑިކުން އަމާޒު ކުރުމުންނެވެ. އެހެންނަމަވެސް އޭނާގެ ސަސްޕެންޝަން އުވާލަން ޖެހުނީ އޭނާ ސަސްޕެންޑް ކުރެވުނީ ގަވާއިދާ ޚިލާފަށްކަމަށް ވަޒީފާއާބެހޭ ޓަރިބިއުނަލްއިން ނިންމުމާއި ގުޅިގެންނެވެ.