އެމްއެމްޕީއާރްސީގެ ހިޔާނާތާގުޅިގެން 20 އަހަރުގެ ޖަލުހުމުމަށް އައިސް، ހުކުމް ތަންފީޒު ކުރައްވަމުން ގެންދަވަނިކޮށް، ފާއިތުވި ރިޔާސީ އިންތިޚާބަށްފަހު ސަރުކާރު ބަދަލު ނުވަނީސް ރައިސް ސާލިހުވަނީ އަދީބަށް، ޕެރޯލް ގާނޫނުގެ ދަށުން މާފް ދީފައެވެ. މާފް ދިނުމާއެކު އަދީބުވަނީ މިމަހުގެ 16 ވަނަ ދުވަހު ރާއްޖެ ދޫކޮށް ފުރާވަޑައިގެންފައެވެ.

އެމްއެމްޕީއާރުސީގެ ބޮޑު ޚިޔާނާތާ ގުޅިން 2015 ވަނަ އަހަރުގެ އޮކްޓޫބަރު މަހުން ފެށިގެން މާފް ދިނުމާއި ހަމައަށް އަދީބު ހުންނަވާފައިވަނީ ޖަލުގައާއި ގޭ ބަންދުގައެވެ. އަދީބަށް 20 އަހަރުގެ ހުކުމް ކުރީ އޮކްޓޫބަރު 5، 2020 ގައެވެ.

އަދީބުއާއި ގާތްކަން އޮންނަ ބައެއް ފާރާތްތަކުން "ޚަބަރު އޮންލައިން" އަށް މައުލޫމާތު ދީފައިވާ ގޮތުގައި، ރާއްޖެއިން ފުރާވަޑައިގަތުމަށްފަހު އަދީބު ވަނީ އުމުރާއެއް ވެވަޑައިގެންފައެވެ. އެއަށްފަހު ދެން އޭނާ ދިރިއުޅުއްވާނީ ސިންގަޕޯރގައި ކަމަށްވެސް ގާތް ބައެއް ފަރާތްތަކުން ބުނެފައިވެއެވެ.

އެހެންނަމަވެސް ޖަލުން މިނިވަން ވުމާއެކު، އަދީބު ކުރެއްވި ޓުވީޓެއްގައި ވިދާޅުވެފައިވަނީ އޭނާ މިނިވަން ވުމާއެކު އަމިއްލަފުޅު ޕާޓީ ހިންގެވުމުގައި ކުރިޔަށް ވަޑައިގަންނަވާނޭކަމުގައެވެ.

އަދީބުވަނީ ޖަލު ހުކުމުގައި ހުންނަވަނިކޮށް ޓަގު ބޯޓެއްގައި ރާއްޖެ ދޫކޮށް ފިއްލަވަންވެސް މަސައްކަތް ކުރައްވާފައެވެ. އެފަހަރު އަދީބު ހައްޔަރު ކޮށްގެން ރާއްޖެ ގެނެސްފައިވަނީ އިންޑިއާގެ ޓުޓިކޮރިންނަށް ވަޑައިގެންނެވިތަނާއެވެ.

އަދީބުއާއެކު ޖަލަށް ލެވުނު ޒިޔަތަށްވެސް ރައީސް ސާލިހުވަނީ މާފް ދެއްވާފައެވެ.