ނޫސްވެރިޔާ އަހުމަދު ސާއިދު ބަލިހާލަތާއިއެކުވެސް ނޫސްވެރިކަމަށް ބަހައްޓަވާ ޝައުގުވެރިކަމާއި، ދެއްވާ ސަމާލުކަން ފާހަގަކޮށް އޭނާގެ ޚިދުމަތުގެ އަގު މޯލްޑިވްސް މޯލްޑިވްސް މީޑިއާ ކައުންސިލް (އެމްއެމްސީ) އިން ފާހަގަކޮށްފިއެވެ.
ދެ ކިޑްނީ ފެއިލްވެ މެދުކެނޑުމެއްނެތި ޑައިލެސިސް ހަދަމުންގެންދާތާ ހަތަރު އަހަރަށްވުރެ ގިނަދުވަސްވެފައިވާ ސާއިދު ބައްޔާ ހަނގުރާމަކުރުމަށް ދައްކަމުންގެންދާ ހިތްވަރަކީ ހަމަ ލާމަސީލު މިސާލެކެވެ. ގާތް ތިމާގެ މީހެއްގެ މާބޮޑު އެއްބާރުލުމެއް ނުލިބި އޭނާ 3 އަހަރާއި 7 މަސްދުވަހު މި ބައްޔާ ހަނގުރާމަ ކުރަމުން ގެންދަނީ ހަމަ އެކަނިމައި އެކަންޏެވެ.
ނޫސްވެރިކަމުގައި ސާއިދުގެ ޚިދުމަތުގެ އަގުވަޒަންކޮށް ރޭ ވަނީ ޚާއްސަ ފިލައެއް ދީފައެވެ. މި ހަނދާނީ ފިލާ އޭނާއަށް އަރުވާފައިވަނީ، ތަޢުލީމާބެހޭ ވަޒީރު ޑޮކްޓަރ އިސްމާޢީލް ޝަފީޢުއެވެ. މި ހަނދާނީ ފިލައަކީ ޞިއްޙީ ގޮތުން ނާޒުކު ޙާލަތެއްގައި ހުންނެވި ނަމަވެސް ހިތްވަރާއެކު ކުރައްވަމުން އަންނަ ޚިދުމަތުގެ އަގުވަޒަންކޮށް ހިތްވަރު ދިނުމުގެ ގޮތުން އޭނާއަށް ދީފައިވާ ހަނދާނީ ފިލައެކެވެ.
ސާއިދަކީ މިހާރުވެސް ދައުލަތުގެ މީޑިޔާ ޕީއެސްއެމްގެ މުހިންމު ސްޓާފެކެވެ. ކޯވިޑާއި ގުޅިގެން ސާއިދު މަސައްކަތް ކުރަން ޖެހެނީ ގޭގައެވެ. ގޭގައި ހުރެގެންވެސް ސާއިދު ޚަބަރު ހެދުމުގެ މަސައްކަތް ކުރެއެވެ. އޭނާއާއި އެކު އޮފީހުގައި މަސައްކަތްކުރާ މުވައްޒިފަކު ކަމުގައިވާ ޕީއެސްއެމްގެ އެޑިޓަރު އަހުމަދު ޖަދުވާން ބުނީ ސާއިދަކީ މަސައްކަތުގައިވެސް އޮފީހުގައި ތިބޭ އެހެން މުވައްޒިފުންނެކޭ އެއްގޮތަށް އެއްވެސް އުޒުރެއް ބަހަނާއެއްނެތި މަސައްކަތް ކުރާ މުވައްޒިފެއްކަމަށެވެ.
ނަމަވެސް މިހާރު ހާލަތު ހުރި ގޮތުންނާއި، ކޮންމެ ދެ ދުވަހަކުން އެއްދުވަހު ޑައިލެސިސް ހަދަން ޖެހުމުން ސާއިދަށް އޮފީހަށް 100 ޕަސެންޓް ނުދެވުނު ނަމަވެސް އޮފީހަށް އޭނާގެ ފަރާތުން އަބަދުވެސް އެއްބާރުލުން ލިބޭކަމަށެވެ. ސާއިދު ރޭގެ ހަފްލާގައި ބައިވެރިވީ އިއްޔެ ހެނދުނު ޑައިލެސިސް ނިންމާލުމަށްފަހު އިއްޔެ ހަވީރު އޮތް އެތްލެޓިކްސް އިވެންޓްގެ ލައިވް ކަވަރޭޖް ދިނުމަށްފަހުގައެވެ.
ސާއިދުގެ ހިތްދަތި ދިރިއުޅުމުގެ ބަނަ ދުވަސްތަކުގައި އޭނާއަކީ ވަރަށް ގިނަ ގޮންޖެހުންތަކާއި ކުރިމަތިވެފައިވާ ޒުވާނެކެވެ. މާޔޫސްވާ އެތައް އެތައް ކަމެއް ދިމާވެ އެކަންކަމާއި ހިތްވަރާއިއެކު ކުރިމަތިލައި ވަކި އަމާޒެއްގައި މަސައްކަތް ކުރާ ޒުވާނެކެވެ. ސާއިދު އެދެނީ އޭނާ ދެކެމުންދާ ހިތްދަތި ދުވަސްތަކާއި ވަގުުތުތައް އެހެން މީހަކަށް ކުރިމަތި ނުވުމެވެ. ޚަބަރު އޮންލައިނުންވެސް އެދެނީ ސާއިދުއަށް ހެޔޮގޮތް މިންވަރު ކުރުމެވެ.
