ރައްޔިތުންގެ މަޖިލީހުގެ ރިޔާސަތު ބަލަހައްޓާ މެންބަރުންގެ ނަންތައް އަލުން ތަރުތީބުކޮށްފިއެވެ.
މަޖިލީހުގެ ރައީސް ބަދަލުވެ ނައިބު ރައީސްގެ އިތުބާރު ނެތް މައްސަލަ ހުށަހެޅިފައިވުމާ ގުޅިގެން ރިޔާސަތު ބަލަހައްޓާ މެންބަރުންގެ ނަންތައް އަލުން ތަރުތީބުކޮށް ނަންތައް އިުއލާންކޮށްފިއެވެ. އަލަށް އެކުލަވާލި ލިސްޓާއި ތަރުތީބު މިއަދުގެ ޖަލްސާގައި އިއުލާނުކުރެއްވީ މަޖިލީހުގެ ރައީސް މުހައްމަދު އަސްލަމެވެ. އެމަނިކުފާނު ވިދާޅުވި ގޮތުގައި ރިޔާސަތު ބަލަހައްޓަވާ ފަސް މެންބަރުންގެ ލިސްޓު އެކުލަވައިލެއްވީ މަޖިލީހުގެ ގަވާއިދުގެ 43 ވަނަ މާއްދާގެ ދަށުންނެވެ.
ރިޔާސަތު ބަލަހައްޓަވާ ފަސް މެންބަރުންނާއި ހިދުމަތް ކުރެއްވި މުއްދަތު:
1. މީދޫ ދާއިރާގެ މެންބަރު އަހުމަދު ސިޔާމު މުހައްމަދު – ފެބްރުއަރީ 27, 2007 އިން ފެށިގެން މިއަދާ ހަމައަށް މެދުކެނޑުމެއްނެތި 18 އަހަރާއި އަށް މަސްދުވަސް
2. މާމިގިލީ ދާއިރާގެ މެންބަރު ގާސިމް އިބްރާހިމް – މެއި 28, 2009 އިން ފެށިގެން މިއަދާ ހަމައަށް މެދުކެނޑުމެެއްނެތި 14 އަހަރާއި ފަސް މަސްދުވަސް
3. އޭދަފުށީ ދާއިރާގެ މެންބަރު އަހުމަދު ސަލީމް – މެއި 28, 2009 އިން ފެށިގެން މިއަދާ ހަމައަށް މެދުކެނޑުމެެއްނެތި 14 އަހަރާއި ފަސް މަސްދުވަސް
4. ހަނިމާދޫ ދާއިރާގެ މެންބަރު އަބްދުލްގަފޫރު މޫސާ – މެއި 28, 2009 އިން ފެށިގެން މިއަދާ ހަމައަށް މެދުކެނޑުމެެއްނެތި 14 އަހަރާއި ފަސް މަސްދުވަސް
5. ކުޑަހުވަދޫ ދާއިރާގެ މެންބަރު އަހުމަދު އާމިރު – މެއި 28, 2009 އިން ފެށިގެން މިއަދާ ހަމައަށް މެދުކެނޑުމެެއްނެތި 14 އަހަރާއި ފަސް މަސްދުވަސް
މަޖިލިސް ގަވާއިދުގެ 44 ވަނަ މާއްދާ ބުނާ ގޮތުން، މަޖިލީހުގެ ރައީސާއި ނައިބު ރައީސް ރިޔާސަތު ބަލަހައްޓަން އުޒުރުވެރިވެއްޖެ ހާލަތެއްގައި ރިޔާސަތު ބަލަހައްޓާނެ ފަސް މެންބަރުން މަޖިލީހުގެ ރައީސާއި ނައިބު ރައީސް އިންތިޚާބުވާތާ ދެ ހަފުތާ ތެރޭގައި ކަނޑައަޅަން ޖެހެއެވެ. އަދި، އެ މެންބަރުން ކަނޑައެޅުމަށް ފަހުގައި ތަޅުމަށް އިއުލާނު ކުރަން ޖެހެއެވެ.
އެ މާއްދާގެ ނ. ގައި ވާގޮތުން، މެންބަރުން ތަރުތީބު ކުރުމުގައި މެންބަރުކަން ކުރި މުއްދަތަށް އިސްކަން ދޭން ޖެހޭނެއެވެ. އަދި، ދެ މެންބަރަކު އެއް މުއްދަތަކަށް ޚިދުމަތް ކުރައްވާފައިވާ ހާލަތުގައި އުމުރުގެ ދޮށީ ކަމަށް އިސްކަން ދެން ވާނެ ކަމަށެވެ.
ވެރިކަން ބަދަލުވުމާއެކު މަޖިލީހުގެ ހަ ގޮނޑި މިވަނީ ހުސްވެފައެވެ. އެ ގޮނޑިތައް ހުސްވި ނަމަވެސް އެ ދާއިރާތަކަށް އަލަށް މެންބަރުން އައްޔަން ކުރަން ބައި-އިލެކްޝަން ނުބާއްވާނެ ކަމަށް އިލެކްޝަންސް ކޮމިޝަނުން މީގެ ކުރިން ވަނީ ބުނެފައެވެ. ކުރިއަށް އޮތް 20 ވަނަ މަޖިލީހުގެ އިންތިޚާބު އޮންނާނީ އަންނަ އަހަރުގެ އޭޕްރީލް މަހުއެވެ.
