ފުލުންގެ މުއައްސަސާ ވަގުތީ ގޮތުން ހިންގެވުމާ ހަވާލުވެ ހުންނެވި އެކްޓިން ޑެޕިއުޓީ ކޮމިޝަނާ އޮފް ޕޮލިސް އަބްދުލް މަންނާން ޔޫސުފާއި ޑެޕިއުޓީ ކޮމިޝަނާ އޮފް ޕޮލިސް (ޑީސީޕީ) އަލީ ރަޝީދު ފުލުހުންގެ ހިދުމަތުން ރިޓަޔަކުރައްވަން ނިންމަވައިފިއެވެ.
މަގާމުން އިސްތިއުފާ ދެެއްވަން ނިންމެވިއިރު، މަންނާން ޔޫސުފް ހުންނެވީ އެކްޓިން ޕޮލިސް ކޮމިޝަނަރު ކަމުގެ މަގާމުގައެވެ. މަންނާން އަކީ މީގެ ކުރިން ފުލުހުންގެ ވަޒީފާ އިން ވަކި ވެސް ކުރި ބޭފުޅެކެވެ. މަންނާން ޑެޕިއުޓީ ކޮމިޝަނަރަކަށް އައްޔަންކުރީ ނޮވެމްބަރު 19، 2018 ގައެވެ. ފުލުހުންގެ މުއައްސިސާ ވަގުތީ ގޮތުން ހިންގެވުމާއި ހަވާލުކުރެއްވީ ކޮމިޝަނާ އޮފް ޕޮލިސްގެ މަގާމުގައި ކުރިން ހުންނެވި މުހައްމަދު ހަމީދު ރިޓަޔާ ކުރެއްވުމުންނެވެ.
ފުލުހުން ވިދާޅުވީ ޑީސީ އަބްދުލް މަންނާން އާއި ޑީސީޕީ އަލީ ރަޝީދު އަންނަ ހޮނިހިރު ދުވަހުން ފެށިގެން ރިޓަޔާ ކުރައްވަން ނިންމަވާފައިވާ ކަމަށެވެ. މިކަމާއި ގުޅޭ އިތުރު ތަފްސީލެއް ފުލުހުން ދެއްވާފައި ނުވެއެވެ.
ފުލުހުންގެ ހިދުމަތުގެ ގާނޫނުގައި ވާގޮތުން ކޮމިޝަނަރު އޮފް ޕޮލިސްގެ މަގާމު ހުސްވެއްޖެ ނަމަ، ހުސްވާ ތާރީހުން ފެށިގެން 45 ދުވަހުގެ ތެރޭގައި އެ މަގާމަށް ބޭފުޅަކު އައްޔަން ކުރަން ޖެހެއެވެ. ޕޮލިސް ކޮމިޝަނަރަކަށް އައްޔަން ކުރަން ޖެހެނީ އެސިސްޓެންޓް ކޮމިޝަނަރު އޮފް ޕޮލިސްގެ ރޭންކުން ފެށިގެން މަތީގެ ރޭންކެއްގެ ބޭފުޅެކެވެ.
އާ ސަރުކާރުގައި މިހާތަނަށް ޕޮލިސް ކޮމިޝަނަރަކު ހަމަޖައްސާފައެއްނުވެއެވެ.
