ރާއްޖޭގައި އިންޑިއާއިން ހިންގާ އެކި ޕްރޮޖެކްޓްތަކުގެ އެއްބަސްވުން ނުލައި، ނިމިދޔަ ސަރުކާރުން އިންޑިއާއާއިއެކު 100 އަށްވުރެ ގިނަ އެއްބަސްވުން ވެފައި އޮތްކަމުގައި ރައީސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ.
ރައީސް މުއިއްޒުގެ ވެރިކަމާއި ހަވާލުވެ ވަޑައިގެންފަހުން، ރައީސް އޮފީހުން މިއަދު ބޭއްވި ފުރަތަމަ ނޫސްވެރިންގެ ބައްދަލުވުމުގައި ރައީސް އޮފީހުގެ އަންޑަރ ސެކަޓްރީފޯ ޕަބްލިކް ޕޮލިސީ މުހައްމަދު ފިރުޒުލް ވިދާޅުވީ ނިމިދިޔަ ސަރުކާރުން ގިނަ އަދަދެއްގެ އެއްބަސްވުންތަކެއް ވެފައިވާކަން ހާމަވެފައިވަކަމަށެވެ.
މިގޮތުން މިހާތަނަށް ސަރުކާރާއި ހަވާލުވެ ސާފުވެފައިވާ މައުލޫމާތަށް ބަލާއިރު، ނިމިދިޔަ ސަރުކާރުން އިންޑިއާއާއިއެކު އެކަނި 100 އަށްވުރެ ގިނަ ބައިލެޓްރަލް އެއްބަސްވުން ވެފައިވާކަމަށް ފިރުޒުލް ވިދާޅުވިއެވެ. މިއެއްބަސްވުންތަކުގައި ރާއްޖޭގެ ސިޔާދަތާއި އިސްތިގުލާލަށް އަރައި ގަންނަ ގޮތަށް އެއްވެސް ކަމެއް އޮތްތޯ ބަލައި، އެކަންކަން ދިރާސާ ކުރަމުންދާކަމަށް ފިރުޒުލް ވިދާޅުވިއެވެ.
ދިވެހިރާއްޖޭގެ ސިޔާދަތަށް އުނިކަން ލިބޭ ގޮތަށް ދޭދޭ ގައުމުތަކާއެކު ވެފައިވާ އެއްބަސްވުންތަކުގައި ސިޔާދަތަށް އުނިކަން ލިބޭހެން ހުރި ނުކުތާތައް އުވާލުމުގެ މަސައްކަތް ފެށިގެންދާނެ.
– ފިރުޒުލް ވިދާޅުވިއެވެ.
އޭނާ ވިދާޅުވީ ދިވެހިންގެ ސިޔާސާދަތަށް އަދި މިނިވަންކަމަށް އަސަރުކުރާ ފަދަ ގޮތަށް ހުރި ހުރިހާ އެއްބަސްވުމެއް މިސަރުކާރުން ބާތިލް ކުރާނެކަމަށެވެ. މިއެއްބަސްވުންތަކުގެ އިތުރުން އެކލި ޕްރޮޖެކްޓްތައް ހިންގުމަށްވެސް ގިނަ އަދަދެއްގެ އެއްބަސްވުން އިންޑިއާއާއިއެކު ވެފައިވާކަމަށް ފިރުޒުލް ވިދާޅުވިއެވެ.
