ރާއްޖޭގައި އިންޑީއާގެ 77 ސިފައިން އެބަތިބިކަމަށް މިހާތަނަށް ލިބިފައިވާ މައުލޫމާތުން ހާމަވެފައިވާ ކަމެއް ކަމުގައި ރައީސް އޮފީހުގެ އަންޑަރ ސެކަޓްރީފޯ ޕަބްލިކް ޕޮލިސީ މުހައްމަދު ފިރުޒުލް ވިދާޅުވެއްޖެއެވެ.
ރައީސް މުއިއްޒުގެ ވެރިކަމާއި ހަވާލުވެ ވަޑައިގެން މިއަދު ބޭއްވި ފުރަތަމަ ނޫސްވެރިންގެ ބައްދަލުވުމުގައި ފިރުޒުލް ވިދާޅުވީ ރާއްޖޭގެ މިނިވަންކަމާއި ސިޔާދަތާއި އިސްތިގުލާލަށް އަސަރު ކުރާނެ އެއްވެސް ކަމަކަށް ޖަގަ ނުދެއްވުމަކީ ރައީސްގެ ވައުދުފުޅެއް ކަމަށެވެ. އެގޮތުން ރާއްޖޭގައ ތިބި އިންޑިއާ ސިފައިންގެ އަދަދު ދެނެގަތުމަށް ކުރި މަސައްކަތުން މިހާތަނަށް ރާއްޖޭގައި 77 އިންޑިއާ ސިފައިން ތިބިކަން ހާމަވެފައިވާކަމަށް ފިރުޒުލް ވިދާޅުވިއެވެ.
ރާއްޖޭގައި އިންޑިއާ ސިފައިން ތިބި ބޭނުމާއި، އަދަދު:
– އެއް ހެލިކޮޕްޓަރު ދުއްވުމަށް – 24 ސިފައިން
– ޑޯނިއާ މަތިންދާ ބޯޓު ދުއްވުމަށް – 25 ސިފައިން
– ދެވަަނަ ހެލޮކޮޕްޓަރެއް ދުއްވުމަށް 26 ސިފައިން
– މިތަކެތީގެ މެއިންޓައިނަސް އަށް ދެ ސިފައިން
މިހާތަނަށް އަޅުގަނޑުމެންނަށް އެއްކުރެވުނު މައުލޫމާތަށް ބަލާއިރު އިންޑިއާ ސިފައިންގެ 77 ސިފައިން ރާއްޖޭގައި ޤާއިމުވެތިބިކަން އަޅުގަނޑު ފަހަގަކުރަން ބޭނުން.
– ފިރުޒުލް ވިދާޅުވިއެވެ.
ފިރުޒުލް އިތުރަށް ވިދާޅުވީ ކުރީގެ ސަރުކާރުން އެހެން ގައުމުތަކާއެކު ވެފައިވާ އެއްބަސްވުމުގައި ހުރި ރާއްޖޭގެ ސިޔާދަތަށް އުނިކަން ލިބޭ މާއްދާތައް އުވާލުމުގެ މަސައްކަތް ފެށިގެން ކުރިޔަށްދާނެ ކަމަށެވެ.
ރާއްޖޭގައި އިންޑިއާ ސިފައިން ތިބުމާއި ދެކޮޅުން ޕީޕީއެމް/ޕީއެންސީއިން އަބަދުވެސް އަޑުއުފުލަމުން ދިޔައެވެ. އެ ގޮތުން އެ ކޯލިޝަނުން އިންޑިއާ އައުޓް ހަރަކާތެއް ވެސް ރާއްޖޭގެ އެކި ކަންކޮޅުތަކުގައި ފޯރިއާއިއެކުގައި ކުރިއަށް ގެންދިޔައެވެ. އަދި ނިމިދިޔަ ރިޔާސީ އިންތިހާބުގައިވެސް އިންޑިއާ ސިފައިން ރާއްޖެއިން ބާލާނެ ކަމަށް ތަކުރާރުކޮށް ރައީސް ޑރ. މުހައްމަދު މުއިއްޒު ވިދާޅުވެފައިވެއެވެ.
ކޮމެންޓު ފޮނުވާ