ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމުގެ ފުރަތަމަ ދުވަހު ކުރައްވާނެކަމަށް ވައުދުވެ ވަޑައިގެންނެވ ހުރިހާ ކަމެއް ފުއްދަވާފައިވާކަމަށް ޕީއެންސީގެ ނައިބް ރައީސް އަދި ހުޅުމާލެ ދާއިރާގެ ކައުންސިލަރު އިބްރާހިމް ޝުޖާ ވިދާޅުވެއްޖެއެވެ.

ރައީސުލްޖުމްހޫރިއްޔާގެ ހުވާ ޑރ. މުއިއްޒު ކުރެއްވީ ހުކުރު ދުވަހުއެވެ. އެއަށްފަހު ޖެހިގެން އައި ވެރިކަމުގެ ފުރަތަމަ ދުވަހު ވަނީ، ފުރަތަމަ ދުވަހަށް އެމަނިކުފާނު ވައުދުވެ ވަޑައިގެންނެވި ކަންކަން ފުއްދަވާފައެވެ. އެންމެ މުހިންމު ކަމެއްގެ ގޮތުގައި އޮތީ ރާއްޖޭގެ އެކި ސަރަހައްދު ތަކުގައި ތިބި އިންޑިއާގެ ސިފައިން ރާއްޖެއިން ފޮނުވާލުމުގެ މަސައްކަތް ފެށުމެވެ. އެކަން ވަނީ ރައީސް ފައްޓާވަފައެވެ.

އެގޮތުން ރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް ދިވެހި ސަރުކާރުން ރަސްމީ ގޮތުން އިންޑިއާ ސަރުކާރުގައި އިއްޔެ ވަނީ އެދިވަޑައިގެންފައެވެ. މިމަސައްކަތުގެ އިތުރުން އެމަނިކުފާނު ވަނީ ދައުލަތުގެ ހިންގުން ހަރުދަނާ ކުރެއްވުމަށް މުހިންމު މިނިނސްޓްރީތަކެއްވެސް އުފައްދަވާފައެވެ.

ޕީއެންސީގެ ނައިބް ރައީސް ވިދާޅުވީ ރައީސް މުއިއްޒަކީ ވައުދުވެ ވަޑައިގެން ވައުދު ފުއްދަވާނެ ރައްޔިތުން ތާއީދާއި ލޯބި ހޯއްދަވާނެ ރައީސެއް ކަމަށެވެ. އަދި ޑރ. މުއިއްޒުއާއި އެމަނިކުފާނުގެ ސަރުކާރަކީ ވައުދުތަކަށް ފިލާނެ ބައެއް ނޫންކަމަށާއި، ވައުދު ފުއްދުމުގައި މިސަރުކާރު ދެމި އޮންނާނެކަމަށް ޝުޖާ ވިދާޅުވިއެވެ.

ރައީސް ޑރ. މުހައްމަދު މުއިއްޒުގެ ފުރަތަމަ ދުވަސް ވިދާޅުވި ގޮތައް ބަރާބަރަށް މިނިއްޖެ. ތިޔަ ލޮބުވެތި ރައްޔިތުންގެ އަތުގައި ޗެކް ލިސްޓެއް ވާނެ.މާރކް ކުރައްވަމުން ގެންދަވާ!ޕީ.ޕީ.އެމް/ޕީ.އެން.ސީއަކީ ވައުދަށް ފިލާނެ ބައެއްނޫން.

– ޝުޖާ ވިދާޅުވިއެވެ.

ހުވާ ކުރެއްވީ ހުކުރު ދުވަހެއްގައި ކަމަށްވިޔަސް، ޖެހިގެން އައި ހޮނިހިރު ދުވަހުން ފެށިގެން ސަރުކާރުގެ މަސައްކަތް ފައްޓަވައި، މިނިސްޓްރީގެ މަސައްކަތް ވަނީ ފަށާފައެވެ.