ރައްޔިތުންގެ ތާއީދާއިއެކު ވެރިކަމަށް ވަޑައިގެންނެވުމުން، ޚިދުމަތް ކުރައްވާނީ ވަރަށް ސާބިތު ކަމާއިއެކު ހާމަކަން ބޮޑުކޮށް ރައްޔިތުން އެދޭފަދަ ވެރިކަމެއް ކަމުގައި އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިހާބުގައި ޕީއެންސީގެ ރިޔާސީ ކެންޑިޑޭޓްގެ ހައިސިއްޔަތުން ވެވަޑައިގެންނެވި ވައުދުތަކާއި ކުރެއްވި ތަގުރީރުތައް ފޮތެއްގެ ސިފައިގައި ނެރުމާއި ފުރަތަމަ 100 ދުވަހުގެ ޕްލޭން އިފްތިތާހުކުރަން ދަރުބާރުގޭގައި ރޭ ބޭއްވި ހަފުލާގައި މުއިއްޒު ވިދާޅުވީ އެމަނިކުފާނާއި، ސަރުކާރާ ހަވާލުވާ އެމަނިކުފާނުގެ ޓީމުން ކުރަން އުޅެނީ ގައުމީ ދީނީ އަދި ގައުމީ މަސައްކަތެއް ކަަމަށެވެ. އެ މަސައްކަތުގައި ސަރުކާރުގެ މަގާމު ތަކަށް ވަޑައިގަންނަވާ ހުރިހާ ބޭފުޅުން އިހުލާސްތެރިވާން ޖެހޭނެ ކަމަށް ވެސް އެމަނިކުފާނު ވިދާޅުވިއެވެ.
މުއިއްޒު ވިދާޅުވި ގޮތުގައި ރިޔާސީ އިންތިހާބުގެ ވައުދުތައް ފޮތެއްގެ ސިފައިގައި ނެރުނީ ހާމަކަން ބޮޑު ގޮތެއްގައި މަސައްކަތް ކުރައްވަން ކަމަށާއި ވައުދުތައް ފުއްދާ މިންވަރު ބަލަން ރައްޔިތުންނަށް ފަސޭހަކޮށްދެއްވަން ކަމަށެވެ. އެގޮތަށް ފޮތެއް ނެރުމަކީ ގޯސް ކަމެއް ކަމަށް ބައެއް ބޭފުޅުން ދެންނެވި ކަމަށް، ސަމާސާ ރާގެއްގައި އެމަނިކުފާނު ވިދާޅުވިއެވެ.
އަޅުގަނޑަށް ބައެއް ބޭފުޅުން ދެންނެވި ތީ ވަރަށް ގޯސްކަމެކޭ ތިކުރީ. ވަރަށް ނުރައްކާތެރި ކަމެކޭ. ދެން ތިފޮތް ނެރެގެން ނޯންނާނެއޭ ފިލޭނެ އެއްގޮތްވެސް. އަޅުގަނޑު ދެންނެވިން ދެއްތޯ ކެމްޕޭންގައި އަޅުގަނޑު ރައްޔިތުން ގާތަށް އައީ ކެމްޕޭންކޮށް ނިންމައި ރައްޔިތުން އަޅުގަނޑަށް ތާއީދުކޮށް ވޯޓުދީ ހޮވީމަ ފިލަކަށް ނޫނޭ. ދެއްކި ކޮންމެ ވާހަކައެއް، ކޮންމެ ޖުމްލައެއް އަޅުގަނޑުމެން އެންމެން އިރާދަ ކުރެއްވިއްޔާ މިތާގަ މިއޮތް ޓީމު ރައްޔިތުންނަށްޓަކައި ގުޅިގެން ހާސިލް ކޮށްދޭނެ.
– މުއިއްޒު ވިދާޅުވިއެވެ.
އިންތިޚާބީ ރައީސް ޑރ. މުއިއްޒު ވިދާޅުވީ ވެވަޑައިގެންނެވި ކޮންމެ ވައުދަކީވެސް ރައްޔިތުންނަށް ފުއްދަވާނެ ވައުދުތަކެއް ކަމަށެވެ. ފޮތެއްގެ ސިފައިގައި ރައްޔިތުންނާއި ހަމައަށް މިކަން ގެނެސްދެއްވީވެސް އެޔަގީންކަން ރައްޔިތުންނަށް ދެއްވުމަށް ކަމަށް މުއިއްޒު ވިދާޅުވިއެވެ.
އެންމެ ފުރަތަމަ ދުވަހުން ފެށިގެން އެންމެ ފަހުން ދުވަހާއި ހަމައަށް ކެމްޕޭންގައި ދެެއްކި ހުރިހާ ވާހަކައެއް، އަދި މެނިފެސްޓޯގައި ހިމެނޭ ހުރިހާ ކަމެއް އެއީ އަޅުގަނޑުމެން ފުރިހަމައަށް ރައްޔިތުންނަށްޓަކައި ހާސިލްކޮށްދޭނެ ކަންތައްތައް.
– އިންތިޚާބީ ރައީސް ޑރ. މުއިއްޒު ވިދާޅުވިއެވެ.
ޖުމުލަ 900 ސޮފުހާ ހިމެނޭ ފޮތުގައި މުއިއްޒުގެ ވާހަކަފުޅުތަކުގެ އިތުރުން އެ މަނިކުފާނު ކެމްޕެއިންގައި ވަޑައިގެންނެވި ކޮންމެ ރަށަކާ ގުޅޭ ހަނދާނީ ފޮޓޯތަކާއި އެ ރަށާއި އަތޮޅާއި ގައުމަށް ވެވަޑައިގެންނެވި ވައުދުތައް ވަކިން ފެންނާނެހެން ވަނީ ހިމަނައިފައެވެ. މުއިއްޒު އެކި ކަންކަމާ ގުޅޭ ގޮތުން ގެންގުޅުއްވާ ތަސައްވުރު ވެސް ފޮތުގައި ވެއެވެ.
އިންތިހާބީ ރައީސް މުއިއްޒުގެ ކޮމިއުނިކޭޝަން އޮފީހުގެ ފަރާތުން މުހައްމަދު އިކްރާމް ރޭގެ ޖަލްސާގައި ވިދާޅުވީ 153 ރަށާއި ފަސް ސިޓީ އަށް މުއިއްޒު ކުރެއްވި ދަތުރުފުޅުގައި 205 ފަހަރު ރައްޔިތުންނާ މުހާތަބު ކުރައްވައި ވާހަކަފުޅު ދައްކަވާފައިވާ ކަމަށެވެ. މިއީ ރާއްޖޭގެ ރައީސެއްގެ ކެމްޕެއިންގައި ދެއްކެވި ހުރިހާ ވާހަކަފުޅެއް ހިމަނައިގެން ނެރުނު ފުރަތަމަ ފޮތް ވެސް މެއެވެ.
