ފުލުހުންގެ އެގްޒެކެޓިވް ރޭންކުގެ އޮފިސަރަކަށް ފުރަތަމަ ފަހަަރަށް އަންހެން ބޭފުޅަކު ޕްރޮމޯޓު ވެއްޖެއެވެ.
މިމަގާމަށް ޕްރޮމޯޓު ވެފައިވަނީ ކުރިން ސުޕްރިޓެންޑެންޓުގެ މަގާމުގައި ހުންނެވި ނަޝްވާއެވެ. އޭނާ ޗީފް ސުޕްރިޓެންޑެންޓުގެ މަގާމަށް ޕްރޮމޯޓު ކޮށްފައިވަނީ ރޭގައެވެ. ނަޝްވާ ވަނީ 2020 ވަނަ އަހަރު އަޕާ ނޯތު ޕޮލިސް ޑިވިޝަންގެ ކޮމާންޑަރުކަން ކުރައްވާފައެވެ.
ނަޝްވާ ތައުލީމް ހާސިލް ކުރެއްވީ ޔުނިވާސިޓީ އޮފް ސަދަން ކުއީންސްލޭންޑުގައެވެ. އެ ޔުނިވާސިޓީގައި ޕަބްލިކް ރިލޭޝަންސް އިން ފުރަތަމަ ޑިގްރީ އަދި ފެޑެރޭޝަން ޔުނިވާސިޓީ އޮސްޓްރޭލިއާއިން 2012 ވަނަ އަހަރު ބިޒްނަސް އެޑްމިނިސްޓްރޭޝަން އެންޑް މެނޭޖްމަންޓުން މާސްޓާސް ޑިގްރީ އޭނާ ވަނީ ހާސިލްކުރައްވާފައެވެ.
ނަޝްވާ ފުލުހުންގެ މުއައްސަސާގައި މަސައްކަތް ކުރާތާ 30 އަހަރުވަނީ ވެފައިވާއިރު، އޭނާވަނީ އެ މުއައްސަސާގެ އިސް މަގާމުތަކެއް ފުރުއްވާފައެވެ.
ފުލުހުން ރޭ ބޭއްވި ރަސްމިއްޔާތުގައި ވަނީ ދިވެހި ފުލުހުންގެ ހިދުމަތަށް 30 އަހަރަށް ވުރެ ގިނަ ދުވަހު ހިދުމަތްކުރި ފުލުހުންނަށްވެސް ޕްރޮމޯޝަން ދީފައެވެ.
ކޮމެންޓު ފޮނުވާ