މީޑިއާ ހިންގުމަށް ޚާއްސަ މީޑިއާ ވިލެޖެއް މާލެ ސަރަޙާއްދުގައި ތަރައްޤީކޮަށްދެއްވާނެކަމަށް އިންތިޚާބީ ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ނޫސްވެރިންނާއި، މީޑިއާގައި މަސައްކަތްކުރާ ފަރާތްތަކާއި ބައްދަލުކުރެއްވުމަށް ސޯޝަލް ސެންޓަރުގައި ބޭއްވި ޚާއްޞަ ހަފްލާގައި ވާހަކަފުޅު ދައްކަވަމުންނެވެ.
ރާއްޖޭގެ މީޑިއާގައި މަސައްކަތްކުރައްވާ ފަރާތްތަކާއި ބައްދަލުކުރެއްވުމަށް ބޭއްވި މިހަފްލާގައި ނޫސްވެރިން ވަނީ ނޫސްވެރިކަމުގެ ދާއިރާގައި ދިމާވާ ގޮންޖެހުންތަކާއި، މި ދާއިރާ ތަރައްޤީކުރަން ބޭނުންވާ ގިނަ ޚިޔާލުތަކެއް އިންތިޚާބީ ރައީސާއި ހިއްސާކުރައްވާފައެވެ. އެގޮތުން ނޫސްވެރިން ހިއްސާކުރި ކަންބޮޑުވުންތަކުގެ ތެރޭގައި އަމިއްލަ މީޑިއާތައް ހިންގުމަށް ތަންތަން ކުއްޔައް ހިފުމުގެ ސަބަބުން ކުރަންޖެހޭ ބޮޑު ހޭދަ ފާހަގަކުރިއެވެ. އަދި ނޫސްވެރިންނަށް ތަމްރީނާ ހުނަރު ދަސްކޮށްދިނުމުގައި ހުރި ދަތިތަކާއި، މީޑިއާ ހިންގުމަށް ދިމާވާ މާލީ ދަތިތައްވެސް ނޫސްވެރިން ފާހަގަކުރިއެވެ. އަދި މިހާރަށްވުރެ ދެފުށް ފެންނަ އަދި ހަމަހަމަ ފުރުސަތުތަކެއް މީޑިއާތަކުގެ މެދުގައި ޤާއިމުކޮށްދެއްވުމަށްވަނީ އެދިފައެވެ.
އެކަންކަމަށް އަލިއަޅުއްވާލައްވާ ވާހަކަފުޅު ދައްކަވަމުން އިންތިޚާބީ ރައީސް ޑރ. މުޙައްމަދު މުޢިއްޒު ވަނީ، މީޑިއާތައް ހިންގުމަށް ބޮޑު ހޭދައެއް ކުރަންޖެހުމަކީ ކަންބޮޑުވުމެއްގެ ގޮތުގައި ފާހަގަކުރެއްވިއެވެ. އަދި އެއީ އެއް ދުވަހުން ހައްލު ގެނެވޭނެކަމެއް ނޫންކަން ފާހަގަކުރައްވަމުން އިންތިޚާބީ ރައީސް ވަނީ އެކަމަށް ޚާއްޞަ ޕްލޭނެއް އެކުލަވާލައްވައި ޙައްލު ގެނެސްދެއްވާނެކަމުގެ ޔަޤީންކަން ދެއްވާފައެވެ. އެގޮތުން މާލެ ސަރަހައްދުން އެކަށީގެންވާ ފެސިލިޓީއެއް ގާއިމްކުރުމުގެ ގޮތުން، މީޑިއާ ވިލެޖެއް ގާއިމްކޮށްދެއްވާނެކަމަށް އިންތިޚާބީ ރައީސް ވިދާޅުވިއެވެ.
މިހާރު ތިބޭފުޅުން މަސައްކަތްކުރައްވަނީ ތަންތަން ކުއްޔަށް ހިފައިގެން. މިއީ މިހާރުން މިހާރަށް ޙައްލުކުރެވޭނެކަމެއް ނޫން. އެހެންނަމަވެސް އަޅުގަނޑުމެން މަސައްކަތްކުރާނީ ކުރިއަށް އޮތްތަނުގައި ގްރޭޓަރ މާލޭ ރީޖަންގައި މީޑިއާތަކަށް ޚާއްސަ މީޑިއާ ކްލަބެއް، މީޑިއާ ވިލެޖެއް ޤާއިމުކުރުން.
– އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވިއެވެ.
ނޫސްވެރިންނަށް ތަޢުލީމާއި ހުނަރުގެ ފުރުޞަތުތައް ފަހިކޮށްދެއްވުމާއި ގުޅޭގޮތުން އިންތިޚާބީ ރައީސް ވިދާޅުވީ، ނޫސްވެރިކަމުގެ ދާއިރާގެ ކޯސްތަކުގައި ކޮންމެ އަހަރަކުވެސް ވަކި އަދަދަކަށް ހިލޭ ސްކޮލަޝިޕް ދީގެން ކިޔެވޭނެ އިންތިޒާމް ފަހިކޮށްދެއްވާނެކަމަށެވެ. މިއީ މިދާއިރާގައި ތަޢުލީމީ ނޫސްވެރިން އުފެދިގެންދާނެ ކަމެއްގެ ގޮތުގައި އިންތިޚާބީ ރައީސް ފާހަގަކުރެއްވިއެވެ. އަދި މީޑިއާއަށް އޮތް މާލީ ދަތިކަން ހައްލު ކޮށްދެއްވުމުގެ ގޮތުން ފައިސާ، އަންނަ އަހަރުގެ ބަޖެޓުގައި ހިމެނުމަށް މަސައްކަތްކުރައްވާނެކަމަށް ޑރ. މުޢިއްޒު ވިދާޅުވިއެވެ. އަންނަ އަހަރަށް ލަފާކުރާ ދައުލަތުގެ ބަޖެޓު މިހާރުވަނީ މަޖިލީހަށް ހުށައަޅާފައެވެ.
މަޖިލީހަށް ބަޖެޓު މިވަގުތު ހުށައަޅާފައިވީނަމަވެސް މީޑިއާތަކަށް ޚާއްސަ ބަޖެޓުގެ އިންސައްތައެއް ހިމެނުމަށް އަޅުގަނޑުމެން އަދިވެސް މިމަރުޙަލާގައި މަސައްކަތްކުރާނަން.
– ޑރ.މުޢިއްޒު ވިދާޅުވިއެވެ.
އިންތިޚާބީ ރައީސް ވަނީ މި ހަފްލާގައިވެސް، އެމަނިކުފާނުގެ ސަރުކާރަކީ ދެފުށްފެންނަ ހާމަކަން ބޮޑު ސަރުކާރަކަށް ވާނެކަމަށް ވިދާޅުވާ ވާހަކަފުޅު ތަކުރާރުކުރައްވާފައެވެ. އެގޮތުން ސަރުކާރުގެ މަޢުލޫމާތުތައް މީޑިއާއަށް ލިބޭނެ ފަސޭހަ އިންތިޒާމެއް ފަހިކޮށްދެއްވާނެކަމަށް އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވިއެވެ.
