އިޒްރޭލުގެ ލާއިންސާނީ ހަމަލާތަކުގައި ހާލުގައި ޖެހިފައިވާ ފަލަސްތީންގެ ރައްޔިތުންނަށް އެހީވުމަށް ސްޓެލްކޯ އިން ފަސްލައްކަ ރުފިޔާ ހަދިޔާކޮށްފިއެވެ.
ސްޓެލްކޯ އިން މިފައިސާ ހަދިޔާކޮށްފައިވަނީ އިންސާނީ އެހީ ދިނުމުގައި ބައިނައަލްގާވްމީ ފެންވަރުގައި ހަރަކާތްތެރިވާ ރާއްޖޭގެ ޖަމިއްޔާ އިންޓަނޭޝަނަލް އެއިޑް ކެމްޕޭން (އައިއޭސީ) އިން ހުޅުވާފައިވާ "އަހަރުމެން ފަލަސްތީނާއެކު ފަންޑަށް" އަށެެވެ.
ސްޓެލްކޯގެ ބޯޑު ރޯމްގައި މިއަދު ބޭއްވި ރަސްމިއްޔާތެއްގައި ފައިސާގެ އެހީ އައިއޭސީއާ ހަވާލުކޮށްދެއްވީ ސްޓެލްކޯގެ މެނޭޖިން ޑިރެކްޓަރު އަހްމަދު ޝަރީފް އެވެ. އައިއޭސީގެ ފަރާތުން ޗެކާ ހަވާލުވީ އެ ޖަމާއަތުގެ ޗެއާމަން އަހްމަދު އިގްބާލްއެވެ. އައިއޭސީގެ ފަންޑަށް އެހީވުމުގެ ގޮތުން ސްޓެލްކޯގެ މައި އޮފީހުގެ ލޮބީގައިވެސް ވަނީ ފަންޑު ފޮއްޓެއް ބަހައްޓާފައެވެ.
އައިއޭސީ އާއި ރާއްޖޭގެ މީޑިއާތައް ގުޅިގެން ފަލަސްތީނަށް އެހީވުމަށް މިދިޔަ ހަފްތާގައި ކުރިއަށް ގެންދިޔަ ޓެލެތޯން މެދުވެރިކޮށްވެސް 12 މިލިއަނަށް ވުރެ ގިނަ ރުފިޔާ ވަނީ ހޯދާފައެވެ.
