މަސްޖިދުލް އަޤްޞާ ބިމާހަމަކޮށްލުމުގެ ބޮޑު މަޝްރޫއެއް ޔަހޫދީން ގެންދަނީ ކުރިޔަށް ގެންދަމުން ކަމުގައި މިއަދުގެ ހުކުރު ޚުތުބާގައި ބުނެފިއެވެ.

"ފަލަސްތީނާއެކު އިސްލާމީ އުއްމަތް" މިމައުޟޫއަށް ރާއްޖޭގެ އެކި ކަންކޮޅުތަކަށް އިއްވި ޚުތުބާގައި ވަނީ ފަލަސްތީނުގެ ބިމުގެ މާތްކަމާއި، އެބިމަށް ޔަހޫދީން އަރައިގަންނަމުންދާ ގޮތްތަކާއި، ޔަހޫދީންގެ ނުބައި ރޭވުންތަކުގެ މައްޗަށް އަލިއަޅުވާލާފައެވެ.

ޚުތުބާގައި ބުނީ ފަލަސްތީނުގެ މުޤައްދަސް ބިމުގައި އިޒްރޭލުގެ ނަމުގައި ޣައިރު ގާނޫނީ ދައުލަތެއް އުފެއްދިތާ ހަތްދިހަ އެތައް އަހަރެއްވެފައިވާ ކަމަށާއި، ފަލަސްތީނުގެ ބިމަށް އަތްގަދަކޮށްގެން ތިބި ޔަހޫދީން މަސައްކަތް ކުރަނީ އެބިމުން މުސްލިމުންގެ ވަސްވެސް ފޮހެލުމަށް ކަމަށެވެ. އަލްގުދުސުގައި ޔަހޫދީންނަށް ގެދޮރު އަޅައިދީ އެތަނުގައި ޔަހޫދީން ވަޒަންވެރި ކުރުވުމުގެ މަޝްރޫއުތައް ދަނީ ހިންގަމުން ކަމަށާއި، ޔަހޫދީ މީޑިއާތައް މެދުވެރިކޮށް އަލްގުދުސުގައިވާ އިސްލާމީ މުގައްދަސް މަލަތައް ދުނިޔޭގެ ލޯތަކަށް އޮޅުވާލުމުގެ ޖަރީމާތައް ހިންގަމުންދާ ކަމަށެވެ. އަދި މަސްޖިދުލްއަގްސާގެ ފޮޓޯކަމަށް މިޒަމާނުގައި މަޝްހޫރުވެފައިވާ ފޮޓޯއަކީ އެމިސްކިތުގެ ފޮޓޯއެއް ނޫން ކަމަށާއި، އެއީ ގުއްބަތުއް ސަޚްރާގެ ފޮޓޯއެއް ކަމަށް ޚުތުބާގައި ބުނެފައިވެއެވެ. ޚުތުބާގައި ބުނީ ޤުއްބަތުއް ސަޚްރާއަކީ އިސްރާއާއި މިއުރާޖުގެ ރޭ ކީރިތި ރަސޫލާ އަރާވަޑައިގަތް ހިލައިގެ މަތީގައި މާފަހުން ކުރެވުނު ބިނާއެއް ކަމަށެވެ.

މީގެ އިތުރުން ޚުތުބާގައި ބުނީ ސުލައިމާނުގެފާނުގެ ބިނާ ހޯދުމުގެ ނަމުގައި މަސްޖިދުލް އަޤްސާގެ ދަށުން ކޮންނަމުންދާ ބިންގަރާސްތަކަކީ މާ ބޮޑަށް ނުރައްކާތެރި ޖަރީމާއެއް ކަމަށެވެ. މީގެ ހަގީގީ ބޭނުމަކީ އެނަމުގައި މަސްޖިދުލް އަގްސާގެ ދަށުގައި ފައްޅިތަކެއް އެޅުން ކަމަށާއި، މި ބިންގަރާސްތައް ކޮނުމުގެ އާހިރު ނަތީޖާއަކަށްވާނީ މަސްޖިދުލް އަގްސާގެ ބިންގާތައް ބަލިކަށިވެ ބިންހެލުމެއްގެ އަސަރު ކިރިޔާ ކުރިޔަސް މަސްޖިދުލްއަގްސާ ވެއްޓި ބިމާ ހަމަވުން ކަމަށެވެ. އަދި ދެން ބިން ސާފުކޮށް ނިމޭއިރު ފެންނަން ހުންނާނީ ޔަހޫދީން ބިންގަރާސް ކޮނެގެން އެޅި ފައްޅިތައް ކަމަށް ޚުތުބާގައި ބުނެފައިވެއެވެ.

ގާފިލުކަމުގެ ނިދިން ހޭލުމަށް ގޮވާލައި ޚުތުބާގައި ބުނީ މަސްޖިދުލްއަގްސާ ބިމާ ހަމަކޮށްލުމުގެ މަޝްރޫއު ފަށާފައިވާއިރު، ދެން ފަށާނީ މައްކާއާއި މަދީނާގެ މާތްވެގެންވާ ދެ ހަރަމްފުޅު ނައްތައިލުމުގެ މަޝްރޫއު ކަމަށެވެ. މި ވާހަކަތައް ޒުވާން ޖީލުތަކާއި ހަމައަށް ގޮންގޮސްދޭން ޖެހޭ ކަމަށާއި، އެކުދިންގެ ހިތްތަކަށް މުސްލިމުންގެ މުގައްދަސް ތަންތަނުގެ ލޯބި ވައްދައިދޭންޖެހޭ ކަމަށެވެ. އަދި އެކުދިންނަކީ އެތަންތަނުގެ ހިމާޔަތުގައި ތެދުވަން ކެރޭ ބަޔަކަށް ހަދަންޖެހޭ ކަމަށާއި، މިއީ މައިންބަފައިންނާއި، މުދައްރިސުންނާއި ވެރިންގެ ވާޖިބެއް ކަމަށް ޚުތުބާގައި ބުނެފައިވެއެވެ.

ތާރީހަށް އިޝާރާތްކޮށް ޚުތުބާގައި ބުނީ އަދުއްވުންނާއި ކުރެވުނު ހަނގުރާމަތަކުގައި މުސްލިމުންނަށް ނަސްރު ލިބިފައިވަނީ ހަނގުރާމަވެރިންގެ އަދަދާއި ވަސީލަތްތައް ގިނަވަގެން ނޫން ކަމަށެވެ. ނަމަވެސް އެބައިމީހުން މާތް ރަސްކަލާންގެ އަސް ބަރޯސާވެ ވަކީލުކުރުމާއެކު ސަބަބުތަކުގައި ހިފައިގެން ކުރިއަސް ދިއުމުން ކަމަށް ޚުތުބާގައި ބުނެފައިވެއެވެ.

މިއަދު މުސްލިމުންގެ އާބާދީ ދެބިޔަނަށް ވުރެ ބޮޑެވެ. ޔަހޫދީންގެ އަދަދަކީ ގާތްގަނޑަކަށް ފަނަރަވަރަކަށް މިލިޔަނެވެ. ސުވާލަކީ މިފަދަ މަދު ބަޔަކަށް ދެ ބިލިއަނަށް ވުރެ ބިޔަ އިސްލާމީ އުއްމަތުގެ މައްޗަށް ނުފޫޒު ފޯރުވައި އެމީހުންގެ މުގައްދަސް ބިންތައް ފޭރިގަނެވެނީ ކިހިނަކުން ހެއްޔެވެ؟ މީގެ ޖަވާބު ކީރިތި ރަސޫލާ ވަނީ ދެއްވާފައެވެ. އެކަލޭގެފާނު ހަދީސް ކުރައްވާފައިވާ ބަސްފުޅެއްގެ މާނާގައިވެއެވެ " ބަޔަކު މީހުން ކެއުމުގެ ސުފުރާ މަތީގައި ކާތަކެތި ބަހާލައިގެން ކައި ހުސްކޮށްލާ ފަދައިން ތިޔަބައިމީހުންގެ މައްޗަށް އުއްމަތްތައް އަރައިގަންނަ ދުވަސް ކައިރިވެއްޖެއެވެ" އެހިނދު ބޭކަލަކު ދެންނެވިއެވެ. އެދުވަހަކުން ތިމަންމެން ވަރަސް މަދުވާނެތޯއެވެ. ކީރިތި ރަސޫލާ ހަދީސް ކުރެއްވިއެވެ. " އަދި ކިއެއް ހެއްޔެވެ؟ އެދުވަހަކުން ތިޔަބައިމީހުން ވަރަށް ގިނަވާނެއެވެ. އެކަމަކު ތިޔަބައިމީހުން ވާހުށީ އޮޔާ ދެމިގެންދާ ކުނިތަކެއް ފަދަ ބަޔަކަށެވެ. އަދި މާތް ރަސްކަލާންގެ ތިޔަބައިމީހުންގެ އަދުއްވުންގެ ހިތްތަކުގައި ތިޔަބައިމީހުންގެ މައްޗަށް އުފެދިފައިވާ ހައިބަވަންތަކަން ނެރެލައްވާ ހުއްޓެވެ. އަދި ތިޔަބައިމީހުންގެ ހިތްތަކަށް ވަހުނު ވައްދަވައިފާ ހުއްޓެވެ. " އެހިނދު ރަސޫލާ ހަދީސް ކުރެއްވިއެވެ. " އެއީ ދުނިޔެއަށް ދަހިވެތިވުމާއި، މަރުވުމަށް ބޭނުން ނުވުމެވެ.

– ޚުތުބާގައި ބުނެފައިވެއެވެ.

ޚުތުބާގައި ބުނީ އިސްލާމީ އުއްމަތަކީ އެއް އުއްމަތެއް ކަމަށާއި، ހުރިހާ މުސްލިމުންނަކީ އުހުއްވަތްތެރި ބައެއް ކަމަށެވެ. މުސްލިމުންނަށް ކުރިމަތިވާ ކޮންމެ ދަތި ހާލަތެއްގައި އެމީހުންނަށް އެހީތެރިވުމަކީ މުސްލިމް އުއްމަތުގެ ވާޖިބެއް ކަމަށް ޚުތުބާގައި ބުނެފައިވެއެވެ.

މިއަދު ވެސް މާތްގެ ވަހީގެ ބަސްފުޅުތަކުން އިބުރަތް ލިބިގަނެ ގާފިލުކަމުގެ ނިދިން ހޭލުމަށާއި، މަސްޖިދުލް އަޤްސާއާއި ފަލަސްތީނުގެ މުގައްދަސް ބިންތައް މިނިވަން ކުރުމަށް ތެދުވެ ހިންދެމެލުމަށް ޚުތުބާގައި ވަނީ ގޮވާލާފައެވެ. އަދި ވަރުގަދަ އިމާންކަމަކާއި، އަދުއްވުންގެ ރޭވުންތައް ބޮއްސުންލާ ފަދަ ހިކުމަތްތެރިކަމާއެކު މާތް ރަސްކަލަނެގެ ހަޒުރަތުން ވާގިއެދިގެން ކުރިއަށްދިއުމަށް އެދިފައިވެއެވެ.