ދިވެހިރާއްޖޭގެ ޚާރިޖީ ދާއިރާގައި 42 އަހަރު ޚިދުމަތް ކުރެއްވުމަށްފަހު ޚާރިޖީ ދާއިރާއިން ރިޓަޔަރ ކުރައްވަން ނިންމަވާފައިވާކަން ފޮރިން މިނިސްޓްރީގެ ސްޓޭޓް މިނިސްޓަރ އަހުމަދު ޚަލީލް ހާމަ ކުރައްވައިފިއެވެ.
ފާއިތުވި ރިޔާސީ އިންތިޚާބަށްފަހު އިދިކޮޅު ޕީޕީއެމްއަށް ލިބުނު ކާމިޔާބަށްފަހު، ފޮރިން މިނިސްޓަރ ޝާހިދު މިނިސްޓަރކަމުން ވަކިވެވަޑައިގަންނަވާތީ މިނިސްޓަރ ޝާހިދު ފޮރިން ސާވިސްގެ މުވައްޒަފުންނާއެކު ބޭއްވި ބައްދަލުވުމުގައި ވާހަކަ ދައްކަވަމުން ސްޓޭޓް މިނިސްޓަރ ޚަލީލް ވިދާޅުވީ 42 އަހަރުގެ ޚިދުމަތަށްފަހު ޚާރިޖީ ދާއިރާއިން ރިޓަޔަރ ކުރައްވަން އެމަނިކުފާނު މިހާރު ނިންމަވާފައިވާ ކަމުގައެވެ. އަދި ސްޓޭޓް މިނިސްޓަރ ޚަލީލްވަނީ ފާއިތުވި ދިގު މުއްދަތުގައި އެމަނިކްފާނަށް އެކި ގޮތްގޮތުން އެހީތެރިކަން ފޯރުކޮށްދެެއްވި ހުރިހާ ފަރާތްތަކަށްވެސް ޝުކުރު އަދާ ކުރައްވާފައެވެ.
މި ބައްދަލުވުމުގައި މިނިސްޓަރ ޝާހިދު ދެއްކެވި ވާހަކަފުޅުގައި ވަނީ، ޚާރިޖީ ދާއިރާއިން ފާއިތުވެދިޔަ 5 އަހަރު ލިބިގެންދިޔަ ހުރިހާވެސް ކާމިޔާބީއެއްގެ ހަގީގީ ހިއްސާދާރުންނަކީ މިނިސްޓްރީއާއި ބޭރުގެ މިޝަންތަކުގައި މަސައްކަތް ކުރެއްވި މުވައްޒަފުން ކަމުގައި ވިދާޅުވެފައެވެ. އަދި މިނިސްޓަރ ޝާހިދުވަނީ، ކުރިޔަށް އޮތް މުއަދަތުގައި އިންތިގާލީ މަރުހަލާގައި އިންތިޚާބީ ސަރުކާރުން އެކުލަވާލާ ޓީމްތަކަށް ފުރިހަމަޔަށް އެއްބާރުލުން ދެއްވުމަށް މުވައްޒަފުންގެ ކިބައިން އެދިވަޑައިގެންފައެވެ.
ފޮރިން ސާވިސްއިން ރިޓަޔަރ ކުރެއްވުމަށް ނިންމެވި ސްޓޭޓް މިނިސްޓަރ ޚަލީލް ޚާރިޖީ ދާއިރާގައި މަސައްކަތް ކުރައްވަން ފެއްޓެވީ 1981 ވަނަ އަހަރު، ސްރީލަންކާގައި ހުންނަ ދިވެހިރާއްޖޭގެ ހައިކޮމިޝަންގެ ތާރޑް ސެކެޓްރީގެ މަގާމުންނެވެ.
އެއަށްފަހު 1994 ވަނަ އަހަރު ޚަލީލްވަނި ޔޫއެންގައި ހުންނަ ދިވެހިރާއްޖޭގެ މިޝަންގެ ފަރސްޓް ސެކެޓްރީގެ މަގާމަށް އައްޔަން ކުރައްވާފައެވެ. އަދި ރާއްޖެއިން ޔުއެންއަށް ކަޑައަޅުއްވާފައި ހުންނަވާ ރެޕްރެސެންޓޭޓިވްގެ މަގާމަށް 2007 ވަނަ އަހަރުގެ ޑިސެމްބަރުމަހުގެ 3 ވަނަ ދުވަހު ޚަލީލް އައްޔަން ކުރެވުނެވެ. އެއަށްފަހު ދިވެހިރާއްޖެއިން ޖަޕާނަށް ކަނޑައަޅުއްވާފައި ހުންނަވާ ސަފީރުކަމުގެ މަގާމަށް 2009 ވަނަ އަހަރުގެ ޑިސެމްބަރުމަހުގެ 9 ވަނަދުވަހު ޚަލީލް އައްޔަން ކުރައްވާފައި ވެއެވެ. ފޮރިން މިނިސްޓްރީގެ ސެކެޓްރީ ބައިލެޓްރަލްގެ މަގާމަށް ޚަލީލް ހަމަޖެއްސެވީ 2016 ވަނަ އަހަރުގެ އޮކްޓޯބަރމަހުގެ 3 ވަނަ ދުވަހުއެވެ.
ފޮރިން މިނިސްޓްރީގެ ސްޓޭޓް މިނިސްޓަރުގެ މަގާމަށް ޚަލީލް އައްޔަން ކުރައްވާފައިވަނީ 2018 ވަނަ އަހަރުގެ ނޮވެމްބަރުމަހުގެ 22 ވަނަ ދުވަހުއެވެ.
