ކުރީގެ ނައިބް ރައީސް އަހުމަދު އަދީބް ޢަބްދުލް ޣަފޫރު ރާއްޖެއިން ބޭރުގައި ކުރައްވަ ބޭސްފަރުވާގެ މުއްދަތު އިތުރު ކުރުމަށް ހުށަހަޅައިފިއެވެ.
އަދީބް ބޭސްފަރުވާއަށް ފުރާވަޑައިގެންނެވީ ރާއްޖެއިން ހެދެން ނެތް ޓެސްޓްތަކެއް ހެދުމަށްކަމަށް މޯލްޑިވްސް ކަރެކްޝަނަލް ސާރވިސްއިން ވަނީ ވިދާޅުވެފައެވެ. އަދީބް ބޭސްފަރުވާއަށް ފުރާ ވަޑައިގެންނެވީ ސިންގަޕޫރަށެވެ. އޭނާ ބޭސް ފަރުވާއަށް ފުރީ މިމަހުގެ 12 ވަނަ ދުވަހުއެވެ. އޭނާ ރާއްޖެއިން ބޭރުގައި ފަރުވާ ހޯދުމަށް ކަރެކްޝަނުން ދެއްވާފައިވަނީ 10 ދުވަހުގެ މުއްދަތެކެވެ.
މިއަދަށް 10 ދުވަސް ހަވާއިރު، ކަރެކްޝަނުން ބުނީ އަދީބްގެ ބޭސްފަރުވާގެ މުއްދަތު އިތުރު ކުރުމަށް ކަރެކްޝަނަށް ހުށަހަޅާފައިވާކަމަށެވެ. ބޭރަށް ފޮނުވާ އެހެން ގައިދީންނެކޭ އެއްގޮތަށް އަދީބުގެ ބޭސްފަރުވާ އިތުރު ކުރުމާއި މެދު ގޮތެއް ނިންމާނީ ކަރެކްޝަނުންގެ މެޑިކަލް ބޯޑުންނެވެ.
މައުލޫމާތު ލިބިފައިވާ ގޮތުގައި އަދީބް އަދި އިތުރު ޓެސްޓުތައް ހަދަން ޖެހޭތީ ދުވަސްތަކެއް ރާއްޖޭން ބޭރުގައިވާނެ ކަމަށް ބެލެއެވެ. އަދީބު ރާއްޖެއިން ބޭރަށް ވަޑައިގެންނެވީ އެކަމަށް ދޫކުރައްވާފައިވާ ވަގުތީ ޓްރެވަލް ޑޮކިއުމެންޓެއްގައެވެ.
އެމްއެމްޕީއާރުސީގެ ކޮރަޕްޝަންގެ މައްސަލަ އަދީބުގެ މައްޗަށް ސާބިތުވެ، 20 އަހަރުގެ ޖަލު ޙުކުމެއް އިއްވާ، 2 މިލިއަން ރުފިޔާއިން ޖޫރިމަނާގެ ޙުކުމެއް އަދީބުގެ މައްޗަށް އިއްވާފައިވަނީ 2020 ވަނަ އަހަރުއެވެ. އެހެންނަމަވެސް، އަދީބުގެ ސިއްޙީ ހާލަތު ހުރި ގޮތުން، މޯލްޑިވްސް ކަރެކްޝަނަލް ސާރވިސްއިން ވަނީ އޭނާ ގޭބަންދަށް ބަދަލުކޮށްފައެވެ.
