ރާއްޖޭގެ ހާރިޖީ ވުޒާރާގައި 40 އަށްވުރެ ގިނަ ދުވަހު މަސައްކަތް ކުރެއްވި އާބިދާ އަހްމަދު ހަނދާނުގައި ތައުޒިޔާގެ ދަފަތްރެއް ހުޅުވުމަށް ފޮރިން މިނިސްޓްރީން ނިންމައިފިއެވެ.
ފޮރިން މިނިސްޓްރީން ހަމަޖައްސާފައިވަނީ ތައުޒިޔާގެ ދަފްތަރު އަންނަ އާދީއްތަ ދުވަހުން ފެށިގެން، މި މަހުގެ 18 ވަނަ ދުވަހުގެ ނިޔަލަށް ރަސްމީ ކޮންމެ ދުވަހެއްގެ ހެނދުނު 10:00 އިން މެންދުރުފަހު 2:00 އަށް ފޮރިން މިނިސްޓްރީގެ އަލްއަމީރު ޙަސަން ފަރީދު މާލަމުގައި (ގްރައުންޑް ފްލޯ) ހުޅުވާފައި ބޭއްވުމަށެވެ.
އާބިދާ ނިޔާވީ މިމަހުގެ 7ވަނަ ދުވަހުރޭ ދަންވަރުގެ ވަގުތެއްގައެވެ. ނިޔާވިއިރު އުމުރަކީ 66 އަހަރެވެ. އާބިދާގެ ކަށުނަމާދު 8 ވަނަ ދުވަހުގެ އަސްރު ނަމާދަށް ފަހު އާސަހަރާ މިސްކިތުގައެވެ.
އާބިދާ ނިޔާވުމާއި ގުޅިގެން ފޮރިން މިނިސްޓަރު ޝާހިދު ކުރެއްވި ޓްވީޓެއްގައި ވިދާޅުވީ އެ މިނިސްޓްރީއާ ވަކިވެގެން ދިޔަ އާބިދާ އަހްމަދަކީ ހާރިޖީ ޓީމުގެ އެއް ތަނބު ކަމަށެވެ.
އެގޮތުން ވަފާތެރިކަމާއި، ލޯތްބާއި، ޝައުގުވެރިކަމާއެކު 40 އަހަރަށްވުރެ ގިނަ ދުވަހު މިނިސްޓްރީއަށް އާބިދާ ހިދުމަތްކުރައްވާފައިވާ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވިގޮތުގައި، އާބިދާ އަކީ އެންމެންގެ އެކުވެރިއެއް ކަމަށާއި އާބިގެ ހަނދާން މިނިސްޓްރީގެ މުވައްޒަފުންގެ ހިތްތަކުން ދުވަހަކުވެސް ފިލައިގެން ނުދާނެ ކަމަށެވެ.
އާބިދާ ސަރުކާރަށް ހިދުމަތް ކުރައްވަން ފެއްޓެވީ، މުލީއާގޭ މެއިޑެއްގެ ވަޒީފާއިން 15 ނޮވެންބަރު 1978 ގައެވެ. މެއިޑެއްގެ ވަޒީފާއިން 8 ޖޫން 1982 ގައި ވަކިވެވަޑައިގަތުމަށްފަހު، އަލުން ހިދުމަތް ފެއްޓެވީ 26 ސެޕްޓެންބަރު 1983 ގައި މޯލްޑިވްސް އެއާޕޯޓްސް އޮތޯރިޓީގެ ޓެލެފޯން އޮޕަރޭޓަރެއްގެ ވަޒީފާއިންނެވެ. އޭގެފަހުން 15 އޮގަސްޓު 1985 އިން ފެށިގެން ހިދުމަތް ކުރައްވަމުން ގެންގޮސްފައި ވަނީ، ފޮރިން މިނިސްޓްރީގައެވެ. މި ވޭތުވެދިޔަ ދިގު މުއްދަތުގެ ތެރޭގައި، އާބިދާވަނީ އެ މިނިސްޓްރީއަށް އަގުހުރި ހިދުމަތްތަކެއް ކޮށްދެއްވައިފައެވެ.
އެ މިނިސްޓްރީގައި އާބިދާ އެންމެ ގިނަ ދުވަހު ހިދުމަތް ކުރައްވައިފައިވަނީ، އެ މިނިސްޓްރީގެ އިދާރީ ހިންގުމާބެހޭ ސެކްޝަންތަކުގައި އާއި، ޑިޕާޓްމަންޓްތަކުގައެވެ. އަދި، ރާއްޖެއިން ޚާރިޖީ ގުޅުން ގާއިމުކޮށްފައިވާ ގައުމުތަކުން ރާއްޖެއަށް ޒިޔާރަތް ކުރައްވާ އެ ގައުމުތަކުގެ ދައުލަތްތަކުގެ އިސްވެރިންގެ ޕްރޮޓޮކޯލް އަދި މެހްމާންދާރީ އަދާކުރެއްވުމުގެ މަސައްކަތްތަކުގައި، ހީވާގިކަމާއި ފަންނުވެރިކަމާއެކު ވަނީ ގިނަގުނަ މަސައްކަތްތަކެއް ކޮށްދެއްވައިފައެވެ. މީގެއިތުރުން، ޒަމާނާއެކު އެ މިނިސްޓްރީގެ އިދާރީ ހިންގުމަށް އަންނަމުންދިޔަ ބަދަލުތައް ތަންފީޒު ކުރުމުގައި އާބިދާގެ ހިއްސާ ވަރަށްބޮޑެވެ.
