އިންކަމް ޓެކްސް ބަޔާން ހުށަހެޅުމުގައި އެހީތެރިވެދޭ ޕްރޮގްރާމެއް މޯލްޑިވްސް އިންލަންޑް ރެވެނިއު އޮޓޯރިޓީ (މީރާ) އިން މިއަދު ފަށައިފި އެވެ.
މީރާ އިން ބުނީ މި ޕްރޮގްރާމަކީ މިދިޔަ އަހަރުގެ އިންކަމް ޓެކްސް ބަޔާން ހުށަހަޅަންޖެހޭ ފަރާތްތަކުގެ ތެރެއިން 10 މިލިއަން ރުފިޔާ ނުވަތަ އެއަށްވުރެ މަދުން އާމްދަނީ ލިބިފައިވާ ފަރާތްތަކަށް އެހީތެރިވެދިނުމުގެ ޕްރޮގްރާމެއް ކަމަށެވެ.
މި ޕްރޮގްރާމް ކުރިއަށްދާނީ މިމަހުގެ 7 އިން ޖޫން މަހުގެ 22 ވަނަ ދުވަހުގެ ނިޔަލަށެވެ. އަދި މި ޕްރޮގްރާމް ކުރިއަށްގެންދާނީ ފޯނު، އީމެއިލް އަދި އެނޫންވެސް އޮންލައިން ޕްލެޓްފޯމްތައް މެދުވެރިކޮށެވެ.
މީރާއިން ވަނީ 2022 ވަނަ އަހަރުގައި 10 މިލިއަން ރުފިޔާ ނުވަތަ އެއަށްވުރެ މަދުން އާމްދަނީ ލިބިފައިވާ ފަރާތްތަކުގެ ތެރެއިން "ކޭޝް ބޭސިސް" އަށް ހިސާބުތައް ތައްޔާރުކުރުމަށް އިހުތިޔާރުކޮށްފައިވާ ފަރާތްތަކުން ޓެކްސް ބަޔާނާއި މާލީ ހިސާބުތައް ތައްޔާރުކުރުމުގައި އެހީތެރިކަން ބޭނުންވާނަމަ މީރާއަށް އީމެއިލް ނުވަތަ ހޮޓްލައިން 1415 އަށް ގުޅުމަށް އެދިފައެވެ.
މީގެ އިތުރުން މީރާގެ ވެބްސައިޓު މެދުވެރިކޮށްވެސް ނަން ނޯޓު ކުރެވޭނެ ކަމަށް މީރާ އިން ވަނީ ބުނެފައެވެ.
ރާއްޖޭގައި ފަރުދުންގެ ޢާމްދަނީން ޓެކްސް ނަގަން ފެށީ 1 ޖެނުއަރީ 2020 ގައެވެ. އިންކަމް ޓެކްސް ނަގަނީ މަހެއްގެ މައްޗަށް 60،000 އަށްވުރެ މަތީ އާމްދަނީއެއް ލިބޭ ފަރާތްތަކުންނެވެ.
