ވިތުރި އާއި އެކު ތަރާވީޙް ނަމާދުގެ ރަކްޢަތްތަކުގެ ޢަދަދު ކަނޑައެޅުމުގައި ސަލަފުން ވަނީ އިޚްތިލާފުވެ ލައްވާފައެވެ.
ބައެއް ރިވާޔަތް ތަކުގައި އެއީ 41 ރަކްޢަތް ކަމުގައި އައިސްފައިވެއެވެ. 39 ކަމަށްވެސް އައިސްފައިވެއެވެ. 29 ކަމަށްވެސް އައިސްފައިވެއެވެ. 23 ކަމަށްވެސް އައިސްފައިވެއެވެ. 19 ކަމަށްވެސް އައިސްފައިވެއެވެ. 13 ކަމަށްވެސް އައިސްފައިވެއެވެ. 11 ކަމަށްވެސް އައިސްފައިވެއެވެ. އެނޫން ގޮތްތަކަށްވެސް އައިސްފައިވެއެވެ.
އުއްމުލް މުއިމިނީނަ ޢާއިޝާ ރަޟިޔަﷲ ޢަންހާގެ ކިބައިން ރިވާވެގެން ވެއެވެ. އެކަމަނާ އާއި ސުވާލު ކުރެވުނެވެ.
(كَيْفَ كَانَتْ صَلاةُ رَسُولِ اللَّهِ صَلَّى اللَّهُ عَلَيْهِ وَسَلَّمَ فِي رَمَضَانَ ؟ فَقَالَتْ : " مَا كَانَ يَزِيدُ فِي رَمَضَانَ ، وَلا فِي غَيْرِهِ ، عَلَى إِحْدَى عَشْرَةَ رَكْعَةً)
މާނައަކީ: "ރަމަޟާން މަހުގައި ކީރިތި ރަސޫލާ ޞައްލަﷲ ޢަލައިހި ވަސައްލަމަ ނަމާދު ކުރައްވަނީ ކޮންގޮތަކަށްތޯއެވެ؟" އެކަމަނާ ވިދާޅުވިއެވެ. "ރަމަޟާން މަހުގައިވެސް އަދި އެހެން މަހެއްގައިވެސް އެގާރަ ރަކްޢަތަށް ވުރެ ގިނަ ނުކުރައްވައެވެ."
އިބްނު ޢައްބާސް ރަޟިޔަﷲ ޢަންހުގެ ކިބައިން ރިވާވެގެން ވެއެވެ. އެކަލޭގެފާނު ވިދާޅުވިއެވެ. (كَانَ يُصَلِّي ثَلَاثَ عَشْرَةَ رَكْعَةً مِنَ اللَّيْلِ) މާނައަކީ: "ކީރިތި ރަސޫލާ ޞައްލަﷲ ޢަލައިހި ވަސައްލަމަ ރޭގަނޑުގައި ތޭރަ ރަކްޢަތް ކުރައްވައެވެ."
މާތް ﷲ ރުއްސުންލެއްވި އައްސާއިބް ބިން ޔަޒީދުގެ ކިބައިން ރިވާވެގެން ވެއެވެ. އެކަލޭގެފާނު ވިދާޅުވިއެވެ. "މީސްތަކުންނައިގެން އެގާރަ ރަކްޢަތް ކުރެއްވުމަށް އުބައްޔު ބިން ކަޢްބަށާއި ތަމީމުއްދާރީ އަށް ޢުމަރު ރަޟިޔަﷲ ޢަންހު އަމުރު ކުރެއްވިއެވެ."
ސަލަފުއްޞާލިޙުންގެ ބޭކަލުން ތަރާވީޙް ނަމާދު ވަރަށް ދިގުކޮށް ކުރެއްވި ކަމަށްވެއެވެ. އައްސާއިބް ބިން ޔަޒީދު ރަޟިޔަﷲ ޢަންހުގެ ކިބައިން ރިވާވެގެން ވެއެވެ. "ރަކްޢަތެއްގައި ސަތޭކަ ވަރަކަށް އާޔަތް ކިޔަވައެވެ. ކޮޅަށް ހުންނަން ޖެހޭލެއް ދިގުކަމުން ޢަޞާގެ މައްޗަށް ބުރަވެގެން ތިބެމެވެ."
މިއީ މިއަދު އަޅުގަޑުމެންނަށް ބައެއް މީހުންގެ ފަރާތުން ފެންނަ ގޮތާއި ޚިލާފު ކަމެކެވެ. މިއަދު ބައެއް މީހުން އަވަސް އަރުވާލާފައި، އެރުކުނަކާއި ނުލައި ނަމާދު ޞައްޙަ ނުވާ މަޑުމައިތިރި ކަމާއި ހަމަހިމޭންކަން ދޫކޮށްލާތަން ފެނެއެވެ. މިގޮތަށް ކަންތައް ކުރުމުގެ ސަބަބުން ފަހަތުގައި ތިބި ޢުމުރުން ދުވަސްވީ މީހުންނާއި، ބަލިމީހުންނަށް އުނދަގޫތަކާއި ކުރިމަތިވެ، ނަމާދުގެ ރުކުނަކަށްވެސް އުނިކަން އައީއެވެ. އެބައިމީހުންގެ އަމިއްލަ ނަފްސަށާއި އެހެން މީހުންނަށްވެސް އަނިޔާވެރި ވެވުނީއެވެ.
މައުމޫމުންނަށް ސުންނަތްތައް ރަގަޅަށް އަދާ ނުކުރެވޭ ވަރަށް އަވަސް އަރުވާލައިގެން ނަމާދު ކުރުމަކީ އިމާމް މީހާގެ މައްޗަށް މަކްރޫހަވެގެންވާ ކަމެއް ކަމުގައި ޢީލްމުވެރިން ވދާޅުވެއެވެ. އެހެންކަމަށްވަނީނަމަ، ނަމާދުގައި ކުރުން ވާޖިބު ކަމަކަށް ހުރަސް އެޅޭ ގޮތަށް ކަމެއް ކުރުން ވާނީ ކިހާވަރެއްގެ ކަމަކަށްތޯއެވެ؟ ﷲ ސުބްޙާނަހޫ ވަތަޢާލާގެ ޙަޟްރަތުން ސަލާމަތް ކަމަށް އެދެމެވެ.
