ރާއްޖޭގެ އިދިކޮޅު ފަރާތްތަކުން އިންޑިއާއި ދިމާކުރަނީ ހަމަ އެކަނި ނަފްރަތު އުފެއްޗުމުގެ ބޭނުމުގައި ކަމަށާއި، "އިންޑިއާ އައުޓު" ހަރަކާތަކީ، ރައްޔިތުންނަށްޓަކާ ތަންފީޒުކުރާނެ އުފެއްދުންތެރި ސިޔާސަތެއް އިދިކޮޅުގައި ނެތުމުގެ ނަތީޖާ ކަމުގައި، ޚާރިޖީ ވަޒީރު އަބުދުﷲ ޝާހިދު ވިދާޅުވެއްޖެއެވެ.
މިހާރު އިންޑިއާއަށް ކުރައްވަމުން ގެންދަވާ ދަތުފުޅުގައި އިންޑިއާގެ "ސްޓްރެޓް ގްލޯބަލް" ޗެނަލްއަށް ދެއްވި އިންޓަރވިއުއެއްގައި ޝާހިދު ވިދާޅުވީ ރައްޖޭގެ އިދިކޮޅު ސިޔާސީ ފަރާތްތަކުގެ އަތުގައި އޮތްހާވެސް އެއްޗަކީ "އިންޑިއާ އައުޓު" ޝިއާރު ކަމަށާއި، މިއީ ރައްޔިތުންނަށްޓަކާ ތައްފީޒު ކުރާނެ އުފެއްދުންތެރި ސިޔާސަތެއް ނެތިގެން، ހަމަ އެކަނި ނަފްރަތު އުފެއްދުމުގެ ބޭނުމުގައި ބޭނުން ކޮށްފައިވާ ޝިއާރެއް ކަމުގައެވެ.
އިންޑިއާއާއި ދިމާކޮށް، އިދިކޮޅުން ބޭނުން ކުރަމުން އަންނަ ޝިއާރުތައް، ބޭނުން ކުރަމުން އަންނަނީ ރައްޔިތުންގެ ހެވާއި ލާބައަށް ތަންފީޒުކުރާނެ ސިޔާސަތެއް ނެތުމުގެ ނަތީޖާއެއްގެ ގޮތުން. އެމީހުންނަށް ހަމައެކަނި ކުރެވެން އޮތް ކަމަކީ ނަފްރަތު އުފެއްދުން. އެހެން ނޫންނަމަށް އެމީހުން އަތުގައި، ރައްޔިތުންނަށްޓަކާ ތަންފީޒު ކުރާނެ ރަގަޅު ސިޔާސަތުތަކެއް އޮތީސް.
އިންޑިއާގެ "ސްޓްރެޓް ގްލޯބަލް" ޗެނަލްއަށް ދެއްވި އިންޓުަވިއުގައި ޝާހިދު ވިދާޅުވިއެވެ.
މި އިންޓަވިއުގައި ވާހަކަ ދައްކަވަމުން ޝާހިދު އިތުރަށް ވިދާޅުވީ، ފާއިތުވެދިޔަ ރައީސް ޔާމިން ޝަރީއަތުން ހާމަ ކޮށްދިނީ ފާއިތުވި 4 އަހަރުގެ ތެރޭގައި ރާއްޖޭގެ ޝަރުއީ ދާއިރާއަކީ، ވެރިކަން ހިންގާ ފަރާތުގެ ނުފޫޒެއް ނެތި، މިނިވަންކަމާއި މުސްތަގިއްލުކަމާއެކު މަސައްކަތްކުރާ ދައިރާއަކަށް ވެގެން ހިގައްޖެކަން ކަމަށާއި، އެކަން ސަރުކާރުން ޔަގީން ކޮށްދީފައިވާ ކަމަށެވެ. ޝާހިދު ވިދާޅުވީ ދިވެހިރާއްޖޭގެ ގާނޫނު އަސާސީގައި އެކަން ބަޔާން ކޮށްފައި އޮތް ގޮތަކީވެސް އެއީ ކަމުގައެވެ.
މިއިންޓަވިއުގައި ޝާހިދު އިތުރަށް ވިދާޅުވީ ދިވެހިރާއްޖެއަކީ ޑިމޮކްރަސީގެ ޅަފަތުގައި އޮތް ގައުމެއްނަމަވެސް، ފާއިތުވެދިޔަ 4 އަހަރު މި ސަރުކާރުން، ޑިމޮކްރަސީގެ އުސޫލުތަކާ އެއްގޮތަށް ދައުލަތް ހިންގުމަށް ބޭނުންވާ ހަގީގީ ބިންގެއް ގާއިމް ކޮށްދީފައި ވާކަމުގައެވެ.
މިއިންޓަވިއުގައި ޝާހިދު ވަނީ އިންޑިއާއަށާއި ބޮޑު ވަޒީރު ނަރެންދުރަ މޯދީއަށް ތައުރީފް ކުރައްވާ، ރާއްޖޭގެ ތަރައްޤީގެ މަޝްރޫޢުތަކަށް އިންޑިއާއިން ދެމުންދާ އެހީތައް ފާހަގަކުރައްވާފައެވެ.
އެގޮތުން ތިލަމާލެ ބްރިޖާއި، ހަނިމާދޫ އިންޓަރނޭޝަނަލް އެއަރޕޯޓާއި، އައްޑޫސިޓީ ގަން އިންޓަރނޭޝަނަލް އެއަރޕޯޓް ތަރައްޤީކުރުމުގައި ލިބެމުންދާ އެހީތައް ޝާހިދު ފާހަގަކުރެއްވިއެވެ. އަދި ރައްޔިތުންނާ ސީދާ ގުޅުންހުރި މަޝްރޫޢުތައްކަމަށްވާ ކެންސަރ ހޮސްޕިޓަލް، ފެނާއި ނަރުދަމާ އަދި ކޮމިއުނިޓީ ސެންޓަރތައް ރަށްރަށުގައި ހެދުންފަދަ މަސައްކަތްތަކުގައި އިންޑިއާގެ އެހީތެރިކަން ލިބެމުންދާކަންވެސް ފާހަގަކުރެއްވިއެވެ.
އަދި އިންޑިއާ ކަނޑު ސަރަޙައްދުގެ ރައްކާތެރިކަން ކަށަވަރުކުރުމަށް، އިންޑިއާ ކަނޑުގެ ޤައުމުތައް ގުޅިގެން ކުރަމުންދާ މަސައްކަތްތައް ފާހަގަކޮށް، ރާއްޖެއަކީ %99 ކަނޑު އޮންނަ ޤާއުމަކަށްވާއިރު، މި ދާއިރާއިން ރާއްޖެއާއި ޤައުމުތަކާއި އޮންނަ ގުޅުން ބަދަހިވުމަކީ ރާއްޖެއަށް ވަރަށް ބޭނުންތެރި ކަމެއްގެ ގޮތުގައި މިނިސްޓަރ ފާހަގަކުރެއްވިއެވެ.
