އިންޑިއާއަށް ބޭސްފަރުވާއަކަށް ގޮސް އުޅެނިކޮށް އެގައުމުން އިމިގްރޭޝަނުން ހައްޔަރުކުރި ކަމަށްބުނާ، އިދިކޮޅު ޕީޕީއެމްގެ ހުޅުމާލެ ދާއިރާގެ ރައީސް އަބްދުއް ސަމަދު (ސަމަދުބެ)ގެ ހައްޔަރާއި ގުޅުންހުރި ކަންކަން ފޮރިންގ މިނިސްޓްރީން ބަލަމުންދާކަމަށް އެމިނިސްޓްރީއާއި ހަވާލާދީ ބައެއް މީޑިއާތަކުގައި ރިޕޯޓު ކޮށްފިއެވެ.

މިގޮތުން ފޮރިންގ މިނިސްޓްރީން ބުނެފައިވަނީ ބެންގަލޫރުގައި ހުރި ދިވެއްސަކު އިއްޔެ އިންޑިއާގެ އިމިގްރޭޝަން އޮފިސަރުންގެ ބެލުމުގެ ދަށަށް ގެންގޮސްފައިވާ ކަމުގެ މައުލޫމާތު ލިބުމާ ގުޅިގެން އެކަމާއި ގުޅިގެން ބަލާންޖެހޭ ކަންކަން އެ މިނިސްޓްރީން ބަލަމުންދާ ކަމުގައެވެ.

ޕީޕީއެމްގެ އިސް އެކްޓިވިސްޓަކު އިއްޔެ އިންޑިއާގެ އިމިގްރޭޝަނުން ހައްޔަރު ކޮށްފައިވާކަމަށް އެންމެ ފުރަތަމަ، އޭނާގެ އާއިލާއާއި ހަވާލާދީ ރިޕޯޓު ކޮށްފައިވަނީ، އިދިކޮޅު ޕީޕީއެމްއަށް ތާއީދުކުރާ ނޫހެއް ކަމުގައިވާ "ދިޔަރެސް" ނޫހުންނެވެ.

"އެމީހުން ބުނި ކަމަށްވަނީ ސަމަދުބެ ޕާސްޕޯޓުގައި މައްސަލައެއް ހުރިކަމަށް. އަދި ޑިޕޯޓުކުރަން ގެންދަނީ ކަމަށް ބުނި"

ސަމަދުގެ ގާތް މީހަކާއި ހަވާލާދީ ދިޔަރެސް ނޫހުން ރިޕޯޓު ކޮށްފައި ވެއެވެ.

އެހެންނަމަވެސް ޕީޕީއެމްގެ އިސް އެކްޓިވިސްޓަކު އިންޑިއާގައި ހައްޔަރު ކޮށްފައިވާކަމެއް އިދިކޮޅު ޕީޕިއެމްގެ ރަސްމީ އެއްވެސް ޗެނަލަކުން ޔަގީން ކޮށްދީފައެއް ނުވެއެވެ.

ސަމަދުއަކީ، އިދިކޮޅު ޕީޕީއެމްއިން ކުރިޔަށް ގެންދިޔަ "އިންޑިއާ އައުޓު" ހަރަކާތްތަކުގައި ވަރަށް އިސްކޮށް ހަރަކާތްތެރި ވެފައިވާ އެކްޓިވިސްޓެކެވެ.

އިދިކޮޅު ޕީޕިއެމްއިން ކުރިޔަށް ގެންދިޔަ "އިންޑިއާ އައުޓު" ހަރަކާތް ހުއްޓާލާފައިވަނީ، އެ ހަރަކާތަކީ ޢައިރު ގާނޫނީ ހަރަކާތެއްކަމަށް ރައީސް ސާލިހުގެ ގަރާރަކުން ކަނޑައެޅި ހިސާބުންނެވެ. އެހެންނަމަވެސް އޭގެ ފަހުންވެސް އިދިކޮޅު ޕީޕީއެމްއިން ކުރިޔަށް ގެންދާ މުޒާހިރާތަކުގައި ދަނީ އަވައްޓެރި އިންޑިއާއާއި ދެކޮޅަށް އަޑު އުފުލަމުންނެވެ.