ހަޤީޤީ އިންޓަރނޭޝަނަލް އެއަރޕޯޓެއްގެ ގޮތުގައި ޒަމާނީ ފެންވަރަށް ހަނިމާދޫ އެއަރޕޯޓު ތަރައްޤީކުރުމަށް ކުރިއަށްގެންދާ މަޝްރުޢުގެ މަސައްކަތް ފަށަން ބޭނުންވާ ސާމާނު މިހާރު އެރަށަށް ގެންގޮސްފައިވާކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާން މިޢުވާން މުޙައްމަދު ވިދާޅުވެއްޖެއެވެ.
ކޮންމެ ހަފްތާއަކު މިއުވާން ބާއްވަވާ ސިލްސިލާ ނޫސްވެރިންގެ ބައްދަލުވުންތަކުގެ ތެރެއިން މިހަފްޓާގެ ބައްދަލުވުމުގައި ވިދާޅުވީ ހަނިމާދޫ އެއަރޕޯޓު ތަރައްޤީކުރުމުގެ މަސައްކަތް މިދިޔަ މަހުގެ 18ވަނަ ދުވަހު ފަށާފައިވާކަމަށާ، މިހާރުވަނީ މަސައްކަތަށް ބޭނުންވާ ސާމާނު އެރަށަށް ގެންގޮސްފައިކަމަށެވެ.
އެގޮތުން ސައިޓު ސާފުކޮށް ވަގުތީ އެކޮމޮޑޭޝަން ގާއިމްކުރުމާއި، މެޓީރިއަލް ބޭލުމުގެ މަސައްކަތް ކުރިއަށް އެބަދާކަމަށް މިއުވާން ވިދާޅުވިއެވެ. އަދި އެއެއަރޕޯޓު ޑިވެލޮޕްމަންޓަށް ބޭނުންވާ މެޓީރިއަލްސްވެސް ވަނީ ހަނިމާދޫއަށް ގެންދެވިފައިކަމަށާ، އެހެންކަމުން އެތަކެތި ބޭލުމުގެ މަސައްކަތް މިހާރު ކުރިއަށްދާކަމަށް އޭނާ ވިދާޅުވިއެވެ. މިމަޝްރޫޢުގެ މަސައްކަތްތައް ކަނޑައެޅިފައިވާ ތާވަލާއި އެއްގޮތަށް ކުރިއަށްދާކަމަށް ވިދާޅުވިއެވެ.
ހަނިމާދޫ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢު ހަވާލުކޮށްފައިވަނީ އިންޑިއާގެ ޖޭ.އެމް.ސީ ޕްރޮޖެކްޓްސްއާއެވެ.
މި މަޝްރޫޢުގެ ދަށުން ހަނިމާދޫގައި 2.46 ކިލޯމީޓަރުގެ އާ ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭނެ ޒަމާނީ ޓަރމިނަލެއް ހަދާނެއެވެ. 2024 ގައި މިމަޝްރޫޢުގެ މަސައްކަތްތައް މުޅިން ނިމޭނެކަމަށް ސަރުކާރުން ވިދާޅުވެއެވެ.
މި މަޝްރޫޢުގެ ޢަމަލީ މަސައްކަތްތައް ރަސްމީކޮށް އިފްތިތާޙުކޮށްދެއްވީ މިދިޔަމަހުގެ 18ވަނަ ދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އިންޑިއާގެ މިނިސްޓަރ އޮފް އެކްސްޓަރނަލް އެފެއަރޒް ޑރ. ސުބްރަމާނިޔަމް ޖައިޝަންކަރެވެ.
