އެމްޑީޕީގެ ކުރިޔަށް އޮތް ރިޔާސީ ޕްރައިމަރީގައި ވާދަ ކުރެއްވުމުގެ ކުރިން، ޕްރައިމަރީގައި ވާދަކޮށް ދިނުމަށް ފޮރިން މިނިސްޓަރ ޝާހިދުގެ އަރިހުން އެދިވަޑައިގެންނެވި ކަމަށާއި، ޕްރައިމަރީގަ ވާދަ ކުރައްވަމުން ގެންދަވަނީ ޝާހިދު އެފުރުސަތުގެ ބޭނުން ނުހިއްޕެވުމުން ކަމުގައި، ރިޔާސީ ޕްރައިމަރީގައި ރައީސް ސާލިހާއި ވާދަކުރައްވަމުން ގެންދަވާ، އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޕްރައިމަރީ ކެމްޕޭންގައި ރ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުތަކުގެ ތެރެއިން ރ. ދުވާފަރުގައި ވާހަކަ ދައްކަވަމުން ނަޝީދު ވިދާޅުވީ، އެމްޑީޕީގެ ޕްރައިމަރީގައި ވާދަ ކުރެއްވުމުގެ ކުރިން ޝާހިދުއާއި މަޝްވަރާ ކުރެއްވި ކަމުގައެވެ. އެގޮތުން ޝާހިދު ޕްރައިމަރީގައި ވާދަ ކުރައްވާނަމަ، އެމަނިކްފާނު ޕްރައިމަރީގައި ވާދަ ނުކުރައްވާނެކަމަށް ޝާހިދަށް ދެންނެވި ކަމުގައިވެސް ނަޝީދު ވިދާޅުވިއެވެ.
އަޅުގަނޑު މިފަހަރު ނުކުތުމުގެ ކުރީގައި ޝާހިދަށް ދެންނެވިން ޝާހިދު ބޭނުން ވާނަމަ، އަޅުގަނޑު މިކަން ކުރާކަށް ނޫޅެމޭ.
ރ. ދުވާހަފަރުގައި އެމްޑީޕީގެ މެމްބަރުންނާއި ބައްދަލުކުރައްވާ ނަޝީދު ވިދާޅުވިއެވެ.
ނަޝީދު ވިދާޅުވީ އެމަނިކްފާނު ޕްރައިމަރީގައި ވާދަކުރައްވަން ޖެހިވަޑައިގަތީ ޝާހިދު އެމްޑީޕީގެ ޕްރައިމަރީގައި ވާދަ ކުރެއްވުމަށް ބޭނުންފުޅު ނުވުމުގެ ސަބަބުން ކަމުގައެވެ.
ފޮރިންގ މިނިސްޓަރ ޝާހިދު މީގެކުރިން ވިދާޅުވެފައިވަނީ އެމްޑީޕީގެ ޕްރައިމަރީގައި ވާދަކުރެއްވުމުގެ ވިސްނުން ނުގެންގުޅުއްވާ ކަމަށާއި، ކުރިޔަށް އޮތް ރިޔާސީ އިންތިޚާބުގައި ތާއީދު ކުރައްވާނީ ރައީސް ސާލިހަށް ކަމުގައެވެ. އަދި ޝާހިދު މިހާރު ގެންދަވަނީ ރައީސް ސާލިހަށް ޕްރައިމަރީ ކާމިޔާބު ކޮށްދިނުމަށް ކެމްޕޭން ކުރައްވަމުންނެވެ.
ރ،. ދުވާފަރުގައި އެމްޑީޕީގެ މެމްބަރުންނާ ވާހަކަ ދައްކަވަމުން ނަޝީދު ވިދާޅުވީ ކުރިޔަށް އޮތް ޕްރައިމަރީ ކާމިޔާބު ކުރައްވާނެ ކަމަށާއި، ރައީސް ސާލިހަށް އެމްޑީޕީގެ މެމްބަރުންގެ ތާއީދެއް މިހާރު ނެތްކަމަށެވެ.
މިހާރު ކުރިޔަށް އެމްޑީޕީގެ ރިޔާސީ ޕްރައިމަރީގައި ވާދަކުރައްވަމުން ގެންދަވަނީ އެމްޑީޕީގެ އެންމެ އިސް ދެ ލީޑަރުންކަމަށްވާ އެޕާޓީގެ އިސްލީޑަރު ރައީސް ސާލިހާއި، އެޕާޓީގެ ރައީސް މުހައްމަދު ނަޝީދެވެ.
އެމްޑީޕީގެ ރިޔާސީ ޕްރައިމަރީ ބޭއްވުމަށް ހަމަޖެހިފައިވަނި މިމަހުގެ 28ވަނަ ދުވަހުއެވެ.
