1987 ވަނަ އަހަރު ޖަޕާން ސަރުކާރުގެ އެހީގައި މާލޭގެ ވަށައިގެން ބިނާކުރި ސީ ވޯލްގެ ރަމްޒީ ބިނާ ކަމުގައިވާ "ބަޖިޔާގާ" އަލުން އެސަރަހައްދުގައި ބަހައްޓައިފިއެވެ.
އެތައް އަހަރެއްވަންދެން ލޮނުޒިޔާރަތްކޮޅުގައި ބަހައްޓާފައިހުރި މިގާ ނަގާފައިވަނީ 2017ވަނަ އަހަރު އެސަރަހައްދުގައި ސިނަމާލެ ބްރިޖް އެޅުމުގެ މަސައްކަތް ކުރުމަށްޓަކައެވެ. ލޮނު ޒިޔާރަތްކޮޅުގައި އޮންނަ އުސްފަސްގަޑު ސަރަހައްދުގައި އަލުން މި ބިނާ ބަހައްޓާފައިމިވަނީ ޖަޕާނާއި ރާއްޖެއާދެމެދު ސިޔާސީ ގުޅުން ގާއިމް ކުރެވުނުތާ 55 އަހަރު ފުރުމުގެ މުނާސަބަތާއި ދިމާކޮށެވެ.
ރާއްޖެއާއި ޖަޕާނާ ދެމެދުއޮތް ގާތްގުޅުމުގެ ރަމްޒެއްގެ ގޮތުގައި، މިގާ އަލުން ލޮނުޒިޔާރަތްކޮޅު ސަރަހައްދުގައި ބަހައްޓާ މި މިބާ އިފްތިތާހު ކޮށްދެއްވާފައިވަނީ، ދެގައުމުގެ ގުޅުމަށް 55 އަހަރު ފުރުމުގެ މުނާސަބަތާއި ދިމާކޮށް، މިހާރު ރާއްޖެއަށް ޒިޔާރަތް ކުރައްމުން ގެންދަވާ ޖަޕާނުގެ ސްޓޭޓް މިނިސްޓަރ ޓަކެއިއާއި ފޮރިންގ މިނިސްޓަރ ޝާހިދެވެ. ޖަޕާނުގެ ސްޓޭޓް މިނިސްޓަރ މިހާރު ރާއްޖެއަށް ކުރައްވަމުން ގެންދަވާ ދަތުރުފުޅުގައި، ރާއްޖެއަށްވަނީ ކުނި މެނޭޖްކުރުމަށް ޚާއްސަ ކޮށްގެން 80 މިލިއަން ޑޮލަރުގެ ފައިސާގެ އެހީއެއްވެސް ޖަޕާން ސަރުކާރުން ފޯރުކޮށް ދެއްވާފައެވެ.
މާލޭގެ ވަށައިގެން ޖަޕާން ސަރުކާރުގެ އެހީގައި ބިނާކޮށްފައިވާ ސީ ވޯލްއަކީ ސުނާމީ ކާރިސާގައި މާލެއަށް ސަލާމަތްތެރިކަން ފޯރުކޮށްދިން އެންމެ މުހިންމު އެއް އައްޑަނައެވެ. އަދި މިއަދުވެސް މާލޭގެ ވަށައިގެން އޮތް ރައްކާތެރިކަމުގެ އެންމެ މުހިންމު ހިމާޔަތެއްގެ ގޮތުގައި އޮތީ މިބިނާއެވެ.
ޖަޕާނާއި ރާއްޖޭގެ ގުޅުމަށް 55 އަހަރު ފުރިފައިވާއިރު، ޖަޕާން ފާހަގަވެގެން ގޮސްފައިވަނީ ރާއްޖެއަށް އެކި ރޮގުރޮގުން ގިނަގުނަ އެހީތަކެއް ފޯރުކޮށް ދެމުންދާ ގައުމެއްގެ ގޮތުގައެވެ. މިގޮތުން އެންމެ ޚާއްސަ ގޮތެއްގައި ފާހަގަ ކޮށްލެވެނީ 2004 ވަނަ އަހަރުގެ ސުނާމީއަށްފަހު ޖަޕާނުން ރާއްޖެއަށް ފޯރުކޮށްދިން އެހީތަކާއ،ި ފާއިތުވެދިޔަ ކޯވިޑް ކާރިސާގައި ޖަޕާނުން ރާއްޖެއަށް ފޯރުކޮށްދީފައިވާ ދީލަތި އެހީތަކެވެ. އޭގެ އިތުރުންވެސް، ވެރިރަށް މާލޭގެ ވަށައިގެން ބިނާކޮށްފައިވާ ސީވޯލް ޕްރޮޖެކްޓާއި، ރާއްޖޭގައި ބިނާ ކޮށްފައިވާ ބޮޑެތި ބައެއް ސޫލްތަކަކީވެސް ޖަޕާނު ސަރުކާރުގެ އެހީގައި އިމާރާތްކޮށްފައިވާ ޚާއްސަ ބިނާތަކެވެ.
އޭގެ އިތުރުންވެސް ތައުލިމީ ދާއިރާއާއި، މަސްވެރިކަމުގެ ދާއިރާއާއި، ދަނޑުވެރިކަމުގެ ދާއިރާގެ އިތުރުން ބަޖެޓްރީ ސަޕޯޓުގެ ގޮތުގައިވެސް ޖަޕާނުންދަނީ ރާއްޖެއަށް އެހީތެރިކަން ފޯރުކޮށްދެމުންނެވެ. ޖަޕާނުގައި ދިވެހިރާއްޖޭގެ އެމްބަސީއެއް ގާއިމް ކުރެވިފައިވަނީ 2007 ވަނަ އަހަރުއެވެ. ރާއްޖޭގައި ޖަޕާނުގެ އެމްބަސީއެއް ހުޅުވާފައިވަނީ 2016ވަނަ އަހަރުގެ ޖެނުއަރީމަހުއެވެ.
ޖަޕާނާއި ރާއްޖޭގައި ހުންނަ ދެގައުމުގެ އެމްބަސީންވެސް ދަނީ، ދެގައުމުގެ ގުޅުމަށް 55 އަހަރުފުރުން ފާހަގަ ކުރުމުގެ ގޮތުން ބައެއް ހަރަކާތްތައް އިންތިޒާމް ކުރަމުންނެވެ.
