ހިފާފައިވާ ގާޒާ ސްޓްރިޕަށް އިސްރާއީލުން ދެމުންދާ އުދުވާނީ ހަމަލާތައް ދިވެހި ސަރުކާރުން ކުށްވެރި ކޮށްފިއެވެ.
އިސްރާއީލުގެ އުދުވާން ކުށްވެރިކޮށް ފޮރިންގ މިނިސްޓްރީން ނެރުނު ބަޔާނުގައި ވިދާޅުވެފައިވަނީ އިސްރާއީލުގެ އުދުވާންގައި ފަލަސްތީންގެ ކުށެއް ނެތް އެތަކެއް ރައްޔިތުންނެއް މަރުވެ އަދި އިތުރު އެތައް ބަޔަކަށް އަނިޔާ ވެފައިވާ ކަމަށާއި، އިސްރާއީލުގެ އުދުވާންގައި މަރުވި އަދި އަނިޔާވި ފަލަސްތީނު ރައްޔިތުންގެ އާއިލާތަކަށް ތައުޒިޔާ ފޮނުވާ ކަމުގައެވެ.
ސަރުކާރުގެ ބަޔާނުގައި ވިދާޅުވެފައިވަނީ، އިސްރާއީލުން ފަލަސްތީނުގެ އާންމު ރައްޔިތުންނަށް އަމާޒުކޮށް ދެމުންދާ ހާލަތާއި ނުބައްދަލު ހަމަލާތަކުގައި ކުޑަކުދިންނާއި އަންހެނުން މަރުވަންދާ ދިއުމަކީ ދިވެހި ސަރުކާރުން ވަކީން ބޮޑަށް ކަންބޮޑުވާ ކަމެއް ކަމުގައެވެ.
ދިވެހި ސަރުކާރުން ހަނދާން ކޮށްދީފައިވާ ގޮތުގައި އިސްރާއީލުން ފަލަސްތީނުގެ ބިންތައް ހިފައިގެން ތިބޭ ތިބުމަކީ ބައިނަލްއަގުވާމީ ގާނޫނުތަކާއި، ޔޫއެންގެ ސެކިއުރިޓީ ކައުންސިލް އަދި ޖެނެރަލް އެސެމްބްލީގެ ގަރާރުތަކާވެސް ޚިލާފް ކަމެކެވެ. އަދި ބަޔާނުގައި ވިދާޅުވެފައިވަނީ، ފަލަސްތީނު އިސްރާއީލުގެ މައްސަލައަށް ދާއިމީ ހައްލެއް ލިބޭނީ މިނިވަން ދެދައުލަތެއްގެ ހައްލު ލިބިގެން ކަމަށާއި ފަލަސްތީނުގެ މިނިވަން ދައުލަތް ގާއިމް ކުރެވެންވާނީ 1967ގެ އިންތަކުގެ މައްޗަށް އަދި އިރުމަތީ ޖެރޫސެލަމް ފަލަސްތީނުގެ ވެރިރަށެއްގެ ގޮތުގައި ބަލައިގަނެގެން ކަމުގައެވެ.
މި ބަޔާން ނިންމަވާލައްވަނުން ސަރުކާރުން ޔަގީންކަން ދީފައިވަނީ ދިވެހި ސަރުކާރު އަބަދުވެސް ދެމި އޮންނާނީ ފަލަސްތީނުގެ ރައްޔިތުންނާ އެކީ ކަމަށާއި، އަދި ފަލަސްތީނުގެ ހައްގުގައި ބައިނަލްއަގުވާމި މައިދާނުގައި ދިވެހި ސަރުކާރުން މަސައްކަތް ކުރަމުން ދާނޭކަމުގައެވެ.
