މިސަރުކާރުގެ ނޫ އިޤްތިޞާދުގެ ސިޔާސަތުގައި އޮންނަނީ ރައްޔިތުން ފެލައިގެން ސިޔާސީ މީހުންގެ މުސާރަ ދިނުންކަމަށް މަޑަވެލި ދާއިރާގެ ކުރީގެ މެންބަރު އަދި ޕީޕީއެމް ސެނެޓުގެ މެންބަރު މުއާޒް މުޙައްމަދު ރަޝީދު ވިދާޅުވެއްޖެއެވެ. މުއާޒް މިހެން މިވިދާޅުވީ ރައްޔިތުންގެ އަތުން ނަގާ ޓެކްސް ބޮޑުކުރަން ސަރުކާރުން ނިންމުމާއި ގުޅިގެންނެވެ.
ޖީއެސްޓީއާއި ޓީޖީއެސްޓީ ބޮޑުކުރަން ނިންމިކަން ސަރުކާރުން އިއްޔެ ވަނީ އިއުލާންކޮށްފައެވެ. އެކަމަށް ފާޑުވިދާޅުވެ މުއާޒް ވިދާޅުވީ، ނޫ އިގްތިޞާދުގަ އޮންނަނީ ރައްޔިތުން ފެލައިގެން ސިޔާސީ މީހުންގެ މުސާރަ ދިނުމާއި، ގައުމު ބަނގުރޫޓް ކުރުންކަމަށެވެ.
ނޫ އިގްތިޞާދުގަ އޮންނަނީ ރައްޔިތުން ފެލައިގެން ސިޔާސީ މީހުންގެ މުސާރަ ދިނުން. ގައުމު ބަނގުރޫޓް ކުރުން. ގޯހެއް ނޫނެއް ނުން.
GST 8%
TGST 16%— Muaz Mohamed Rasheed (@muazmr) July 5, 2022
މުއާޒް މިހެން ވިދާޅުވެފައިވާއިރު، ސިޔާސީ މަޤާމުތައް މަދުކުރާނެކަމަށް ބުނެ މިސަރުކާރު އައިނަމަވެސް، ކުރީ ސަރުކާރަށްވުރެ ސިޔާސީ މަޤާމުތަކާއި، އެ މަޤާމުތަކަށް ކުރާ ހޭދަ ބޮޑުކަމަށް ބުނެ ބައެއް ފަރާތްތަކުން އަންނަނީ ސަރުކާރަށް ފާޑުކިޔަމުންނެވެ.
އިޤްތިޞާދަށް އަންނަ ހީނަރުކަމާއި ގުޅިގެން ޓެކްސް ބޮޑުކުރަން ސަރުކާރުން ނިންމުމަކާއި ގުޅިގެންވެސް ގިނަބަޔަކު އަންނަނީ ކަންބޮޑުވުން ފާޅުކުރަމުންނެވެ.
އިއްޔެ ނޫސްވެރިންނާއި ބައްދަލުކުރައްވާ ވާހަކަފުޅުދައްކަވަމުން ފިނޭންސް މިނިސްޓަރ އިބްރާހިމް އަމީރު ވިދާޅުވީ ދައުލަތުގެ މާލީ ހާލަތު ރަނގަޅުކުރުމަށް މިވަގުތު ފިޔަވަޅުތަކެއް ނާޅައިފިނަމަ ކުރިއަށްއޮތްތަނުގައި ދިމާވާ ދަތިތައް ބޮޑުވާނެކަމަށެވެ. އެހެންކަމުން ދައުލަތުގެ ހަރަދުތައް ކުޑަކޮށް، އާމްދަނީ އިތުރުކުރުމަށް ފިޔަވަޅުތަކެއް އަޅަން ނިންމާފައިވާކަމަށް އަމީރު ވިދާޅުވިއެވެ.
އެގޮތުން އަޅާ ފިޔަވަޅުތަކުގެ ތެރޭގައި ޓީޖީއެސްޓީ 12 އިންސައްތައިން 16 އިންސައްތައަށް، އަދި ޖީއެސްޓީ 6 އިންސައްތައިން 8 އިންސައްތައަށް ބޮޑުކުރުމަށް ނިންމާފައިވާކަމަށެވެ. މިނިސްޓަރ ވިދާޅުވީ ޓެކްސް ބޮޑު ކުރުމާއެކު ޓެކްސްދައްކަން ޖެހޭ ފަރާތްތަކަށް 6 މަހުގެ މުއްދަތެއް ދިނުމަށްޓަކައި މަޝްވަރާތައް ކުރައްވަމުން އަންނަކަމަށެވެ. އަދި ރާއްޖޭގެ ޖީއެސްޓީ އަދި ޓީޖީއެސްޓީ ރޭޓް ހުރީ ދުނިޔޭގެ ތަރައްޤީވަމުން އަންނަ ކުދި ޤައުމުތަކާ އަޅާބަލާއިރު ދަށްކޮށްކަމަށް މިނިސްޓަރ ވިދާޅުވިއެވެ.
މިއާއެކު އެމްޑީޕީގެ ރައީސް އަދި މަޖިލިސް ރައީސް މުޙައްމަދު ނަޝީދު ވިދާޅުވެފައިވަނީ، ދިވެހި ސަރުކާރުން ހިސާބު ޖައްސަވަނީ މުޅިން ގޯސްކޮށް ކަމަށާއި، ރާއްޖެ މިދަނީ ދަރަން ކަމަށެވެ.
ރައީސް ނަޝީދު ވިދާޅުވީ މިހާލަތުގައި ދަރަނި ރީ ސްޓްރަކްޗަރ ކޮށްފަ ޚަރަދު ކުޑަކޮށްފިނަމަ ޓެކްސް ބޮޑު ކުރާކަށް ނުޖެހޭނެކަމަށެވެ. ރައީސް ނަޝީދު ވިދާޅުވީ މިދަރަޖައަށް ޤައުމުގެ ކަންކަން ބޮއްސުންލައިގެން މިދަނީ ރައީސުލްޖުްހޫރިއްޔާ މިކަންކަން ބައްލަވަން ޖެހޭވަރަށް ނުބައްލަވާތީކަމަށެވެ.
މިސަރުކާރުން ގެންގުޅޭ ނޫ އިޤްތިޞާދަކީ ރާއްޖޭގެ ގުދުރަތީ ނިޒާމާއި ވަސީލަތް ބޭނުންކޮށްގެން ޤައުމުގެ ފުދުންތެރިކަން އިތުރުކުރުމެވެ.
